Dünýä belli «Time» žurnaly «Inter Maýami» klubunyň argentinaly super ýyldyzy Lionel Messini ýylyň türgeni diýip yglan etdi.
Žurnal tarapyndan berlen beýanatda Messiniň bir wagtlar diýseň kyn görlen zady, ABŞ-ny futbol ýurduna öwürmegi başarandygy bellenilýär.
Messi bolsa žurnala beren interwýusynda birnäçe alternatiwiň arasyndan «Inter Maýamini» saýlandygyny aýdyp: – Aslynda birinji islegim Barselona dolanmakdy. Ýöne bu bolmady. Başga-da birnäçe mümkinçilik bardy. Saud Arabystanyna gitmek barada hem pikir etdim. Maýami şäherine gelmezden öň, bu babatda maşgalam bilen maslahatlaşdym we ahyrynda-da şu ýere geldim – diýip gürrüň berdi.
Iýul aýynda «Inter Maýami» toparynyň düzümine goşulan Messi täze kluby bilen Ligalar Kubogyny gazanypdy.
