Ozal habar berşimiz ýaly, şu gün Aşgabatda «Bagtyýarlyk döwrüniň teatr sungaty» atly IV halkara teatr festiwaly öz işine başlady.
15-nji noýabrda — halkara festiwalyň ikinji gününiň birinji ýarymynda Aşgabadyň Magtymguly adyndaky milli sazly drama teatrynda Russiýa Federasiýasynyň Tatarystan Respublikasynyň Galiasgar Kamal adyndaky Tatar döwlet akademiki teatrynyň «Gelmişek» atly spektakly görkeziler.
Türkmenistanyň Alp Arslan adyndaky milli drama teatrynda türkmen artistleri Çingiz Aýtmatowyň «Ak gämi» powestiniň esasynda döredilen sahna eserini görkezerler.
Türkmenistanyň Magtymguly adyndaky milli sazly-drama teatrynyň döredijilik topary bolsa Gowşutgeldi Daňatarowyň «Leýli we Mejnun» pýesasynyň esasynda döredilen «Söýgi hem hasrat» atly sahna eserini tomaşaçylara hödürlär.
Arkadag şäheriniň Aman Gulmämmedow adyndaky döwlet drama teatrynda Gyrgyz Respublikasynyň Batken welaýatynyň Appaz Žaýnakow adyndaky sazly drama teatry myhmançylykda bolup, «Magtymguly Pyragy» atly sahna eserini tomaşaçylara ýetirer.
Festiwalyň jemleýji gününde — 16-njy noýabrda Türkmenistanyň Beýik Saparmyrat Türkmenbaşy adyndaky Baş akademiki drama teatrynda «Magtymguly — köňül guşy» atly spektakl görkeziler. Şol gün Azerbaýjan Respublikasynyň Şuşa döwlet sazly drama teatry Türkmenistanyň Magtymguly adyndaky milli sazly drama teatrynyň sahnasynda «Edelweýs ýa-da sen mydama meniň ýanymda» atly pýesany görkezer.
