Türkmenistanyň Daşary işler ministri Raşid Meredow Ysraýyl Döwletiniň Türkmenistandaky täze bellenen ilçisi Ysmaýyl Haldi bilen duşuşyk geçirdi. Ilçi duşuşygyň başynda ministre ynanç hatlarynyň nusgalaryny gowşurdy.
22-nji martda geçirilen duşuşykda Türkmenistanyň DIM-niň ýolbaşçysy ilçini bu wezipä bellenmegi bilen gutlady hem-de onuň geljekki işiniň iki ýurduň arasyndaky gatnaşyklaryň mundan beýläk hem ösdürilmegine ýardam berjekdigine ynam bildirdi.
Duşuşygyň çäklerinde diplomatlar özara gyzyklanma bildirilýän ähli ugurlar boýunça türkmen-ysraýyl hyzmatdaşlygynyň ýagdaýyny we mümkinçiliklerini ara alyp maslahatlaşdylar.
Köptaraplaýyn meýdançalarda hyzmatdaşlyk etmekde, şol sanda halkara başlangyçlary we teklipleri özara goldamakda oňyn tejribäniň bardygy beýan edildi.
Söwda-ykdysady gatnaşyklary işjeňleşdirmek üçin bilelikdäki hökümetara toparyň döredilmeginiň maksadalýykdygy nygtaldy.
Türkmenistanyň daşary syýasat edarasynyň habar berşi ýaly, söhbetdeşlikde medeni-ynsanperwer gatnaşyklaryň ösdürilmeginde ileri tutulýan ugurlar hökmünde saglygy goraýyş we lukmançylyk, ylym-bilim ugurlary kesgitlenildi. Şol bir wagtda ysraýyl tarapy Türkmenistanda Ysraýylyň Medeniýet günlerini geçirmekde gyzyklanmalaryny beýan etdi.
Duşuşygyň ahyrynda taraplar ikitaraplaýyn özara hereketleri ösdürmek üçin tagallalary gaýgyrmajakdyklaryny tassykladylar.
