Türkmenistanyň tennis boýunça 14 ýaşa çenli ýetginjekler ýygyndysy dünýä çempionatynyň pleý-off tapgyryna çykdy. Bu barada ýurduň Tennis federasiýasynyň metbugat gullugy habar berýär.
ITF World Junior Tennis Competition 14 & Underiň Aziýa we Okeaniýa sebiti boýunça saýlama tapgyrynyň Şri-Lankanyň Kolombo şäherinde geçirilen toparlaýyn duşuşyklarynda türkmenistanly oglanlar Saud Arabystanynyň ýygyndysyny 3:0 hasabynda ýeňdiler. Ilkinji duşuşykda Imran Ahundow Haider Mohammad al-Fraidi 7:5, 6:3, soňra Selim Çagylow Abdulrazak al-Henabini 6:4, 6:0 hasabynda ýeňdi. Üçünji duşuşykda Imran Ahundow ― Selim Çagylow jübüti saud arabystanly garşydaşlaryndan 6:2, 6:1 hasabynda üstün çykdylar. «D» toparçada birinji orny eýelän oglanlar pleý-offda Nepalyň ýygyndysynyň garşydaşy boldular.
Gyzlaryň arasyndaky ýaryşyň ilkinji duşuşygynda Ilima Guseýinowa gyrgyzystanly Kamila Aripowany 6:7 6:3 7:6 hasabynda ýeňdi. Ikinji duşuşykda Natalýa Martynowa başga bir gyrgyzystanly Ýewa Gawşinodan 3:6 5:7 hasabynda asgyn geldi. Ýöne türkmenistanly gyzlar jübütleýin duşuşykda üstünligi ýene-de öz ellerine geçirip, bu gezek 6:1 6:3 hasabynda üstün çykyp, «B» toparçada ikinji orny eýelediler. Olaryň pleý-offdaky garşydaşy Malaýziýaly tennisçiler bolar.
Dünýä çempionatynyň saýlama böleginiň çärýek final duşuşyklary 16-njy fewralda geçiriler.
Saýlama tapgyr 18-nji fewral güni tamamlanar.
