Aziýa Futbol konfederasiýasynyň (AFK) 2-nji derejeli klub ýaryşy bolan AFK Kubogynda çempion belli boldy. Malaýziýanyň paýtagty Kuala Lumpurdaky Bukit Jalil Milli stadionynda oýnalan finalda ýerli «Kuala Lumpur Siti» topary bilen Omanyň «Al-Sib» topary duşuşdy.
Myhmanlaryň doly artykmaçlygynda geçen oýunda omanlylar 3-0 hasabynda ynamly ýeňiş gazandylar. «Al-Sib» toparyna ýeňiş getiren gollary Al-Busaidi (22), Al-Mukbali (37) hem-de Al-Gassani (69) geçirdi. Şeýlelikde, 19-njy gezek geçirilýän ýaryşda ilkinji gezek Oman döwletiniň kluby çempionlyk gazandy.
Çempion bolan toparyň ýyldyzy Eid Al Farsi ýaryşyň iň ökde oýunçysy saýlandy. 5 gol geçiren futbolçylardan «Wiettel» toparynyň braziliýaly oýunçysy Pedro Paulo iň netijeli futbolçy boldy.
