Geçen gije UEFA-nyň Çempionlar ligasynda 1/8 finalyň jogap duşuşyklarynyň ýene-de ikisi geçirildi. Olarda «Mançester Ýunaýted» «Atletiko Madridi», «Aýaks» bolsa «Benfikany» kabul etdi.
«Old Traffordda» geçirilen duşuşykda «Mançester Ýunaýted» ispaniýaly garşydaşyndan 0:1 hasabynda utuldy. Duşuşykdaky ýeke-täk pökgini 41-nji minutda Renan Lodi geçirdi. Duşuşygyň 61 göteriminde pökginiň ýer eýelerinde bolmagy olary bu utulyşdan halas edip bilmedi.
Iki toparyň arasynda Madrid şäherinde bolan duşuşyk 1:1 hasabyndaky deňlik bilen tamamlanypdy. Şeýlelikde, «Atletiko» iki duşuşygyň netijesi boýunça 2:1 hasabynda öňe geçip, ýaryşyň çärýek finalyna çykdy.
Angliýadaky ýagdaý Niderlandlar Patyşalygynda hem gaýtalandy. Ýerli «Aýaks» öz meýdanynda Portugaliýanyň «Benfikasyna» 0:1 hasabynda boýun egdi. Bu duşuşykda pökgi 61 göterim ýer eýelerinde boldy, ýöne netije olaryň ýaryşyň şu ýerinde pellehana gelendigini görkezýär. Çünki «Benfikanyň» meýdanynda geçirilen birinji duşuşyk 2:2 hasabyndaky deňlik bilen tamamlanypdy. Şeýlelikde, Portugaliýanyň topary iki duşuşygyň netijesi boýunça 3:2 hasabynda öňe geçip, çärýek finala çykdy.
Ýewropanyň birinji derejeli yklym ýaryşynyň 1/8 finaly şu gije «Ýuwentus» ― «Wilýarreal» we «Lill» ― «Çelsi» duşuşyklary bilen dowam eder.
