Soňky habarlar

Arhiw

Gazagystanyň Premýer-ministriniň orunbasary Aşgabatda saparda bolýar

16:2012.02.2022
0
8988

12-nji fewralda Aşgabatda Türkmenistanyň Prezidenti Gurbanguly Berdimuhamedowyň türkmen paýtagtyna iş sapary bilen gelen Gazagystan Respublikasynyň Premýer-ministriniň birinji orunbasary Roman Sklýar bilen duşuşygy geçirildi.

Türkmenistanyň DIM-niň habar berşi ýaly, saparyň çäklerinde Gazagystanyň Premýer-ministriniň Birinji orunbasary R.Sklýaryň Türkmenistanyň Ministrler Kabinetiniň Başlygynyň Orunbasary S.Berdimuhamedow bilen hem duşuşygy geçirildi.

Taraplar türkmen-gazagystan özara hereketleriniň syýasy, söwda-ykdysady we medeni-ynsanperwer ulgamlarynda ileri tutulýan meselelerini ara alyp maslahatlaşdylar.

Şol sanda iki ýurduň ähmiýetli mümkinçilikleriniň işjeň peýdalanylmagy arkaly ulag-üstaşyr geçirimleri, söwda-ykdysady düzümleri, oba hojalygy hem-de daşky gurşawyň goragy ulgamlaryndaky hyzmatdaşlygyň giňeldilmegi babatynda hem pikirler alyşyldy.

Söhbetdeşligiň barşynda şonuň ýaly-da Türkmenistanyň we Gazagystan Respublikasynyň döwlet we hususy pudaklarynyň işjeň çekilmegi bilen, ýangyç-energetika, senagat ulgamlaryndaky özara hereketleriň ösdürilmegine, hususan-da halkara we sebitleýin awtoulag, demir ýol we deňiz gatnawlarynyň giňeldilmegine aýratyn ähmiýet berildi.

Bu ugurlar boýunça gepleşikler R.Sklýaryň Türkmenistanyň Ministrler Kabinetiniň Başlygynyň Orunbasary Ş.Abdrahmanow, ýurdumyzyň ugurdaş ministrlikleriniň hem-de pudak edaralarynyň ýolbaşçylary, Mary welaýatynyň häkimi bilen geçirilen duşuşyklaryň barşynda hem dowam edildi.

Duşuşyklaryň çäklerinde taraplar Türkmenistanyň we Gazagystanyň geljegi uly bolan ugurlaryň ählisi boýunça ikitaraplaýyn hem-de köptaraplaýyn gatnaşyklaryň ösüşiniň oňyn depginini belläp geçdiler.

Mundan başga-da, taraplar iki ýurduň ugurdaş düzümleriniň ýolbaşçylarynyň duşuşyklarynyň geçirilmegi bilen birlikde ikitaraplaýyn gatnaşyklaryň şertnama-hukuk binýadynyň has hem giňeldilmeginiň zerurlygyny nygtadylar.

Teswirler
Teswir ýazmak üçin içeri giriň ýa-da registrasiýa boluň