Türkmenistanyň futbol federasiýasynyň ýolbaşçylary Merkezi Aziýanyň futbol assosiasiýasynyň (CAFA) VI gurultaýyna gatnaşdylar. Gurultaýyň barşynda guramanyň 2021-nji ýylda alyp baran işleriň jemleri jemlenip, 2022-nji ýyldaky wezipeler kesgitlenildi. Bu barada Täjigistanyň Futbol federasiýasynyň resmi saýty habar berýär.
CAFA-nyň prezidenti Rustami Emomali açylyş çykyşynda guramanyň Merkezi Aziýa da futboly ösdürmekdäki goşandyny belläp, soňky iki ýylda halkara ýaryşlary geçirmekde koronawirus pandemiýasynyň täsirine ünsi çekdi. Şeýle-de bolsa CAFA tamamlanyp barýan ýylda Duşenbe şäherinde halkara ýaryşlaryň üçüsini geçirdi. Geljek ýylda bolsa sekiz ýaryşy geçirmek meýilleşdirilýär.
Şeýle hem gurultaýda guramanyň 2021-nji ýyldaky işleri barada hasabat diňlenilip, 2022-nji ýyl üçin aýrylan býujet barada habar berildi.
Özbegistanyň Futbol assosiasiýasynyň wise-prezidenti Rawşan Irmatow geljek ýylda FIFA-nyň günlerinde Merkezi Aziýanyň ýygyndylarynyň gatnaşmagynda «Nowruz kubogyny» geçirmek baradaky teklip bilen ýüzlendi.
