Soňky habarlar

Arhiw

2021-nji ýylyň 1-nji aprelinden şäherara awtobus gatnawlarynyň üçüsi synag hökmünde dikeldiler

14:2030.03.2021
0
51911

«Türkmenawtoulaglary» agentligi resmi web saýtynda 2021-nji ýylyň 1-nji aprelinden şäherara awtobus gatnawlarynyň üçüsiniň synga hökmünde açylýandygyny habar berdi. Olar Aşgabat ― Daşoguz ― Aşgabat, Aşgabat ― Mary ― Aşgabat, Aşgabat ― Türkmenbaşy ― Aşgabat ugurlarydyr.

Synag hökmünde açylýan täze ugurlar bilen baglylykda «Türkmenawtoulaglary» agentligi sürüjilerden we ýolagçylardan birnäçe talaplary bildirýär.

Şol talaplara laýyklykda, ýurdumyzyň çäklerine ýiti öýken sowuklama keselini dörediji ýokanjyň getirilmeginiň we ýaýramagynyň öňüni almak boýunça ulag serişdeleriniň ähli görnüşlerinde zyýansyzlandyryş işlerini geçirmegiň

Tertibine laýyklykda, «Awtomobil ulag hyzmaty» açyk görnüşli paýdarlar jemgyýeti tarapyndan şäherara ugurlar boýunça gatnaýan awtobuslarda arassaçylyk we zyýansyzlandyryş işleri geçiriler. Her bir ýolagçy ýol petegini almazdan öň «Aşgabat şäherine gelýän we welaýatara gatnaýan ýolagçylaryň hereketiniň Tertibine» laýyklykda, ýaşaýan ýeri boýunça saglyk öýünden COVID-19 esasynda saglyk kepilnamasyny we Aşgabat şäheriniň we welaýatlaryň häkimlikleri tarapyndan döredilen topar tarapyndan «Welaýatlara gitmek üçin iş toparynyň Rugsatnamasyny» almaly bolar. Ýolagçylar ýazgyda duran ýerine yzyna dolanyp gaýtmagy üçin ýol petegini alýan wagty degişli tertibiň ikinji bölegindäki resminamalar talap edilmeýär.

Aşgabat ― Daşoguz ― Aşgabat şäherara ugry boýunça gatnaýan awtobuslara ýolagçylar diňe başlangyç duralgada münüp, ahyrky duralgada düşüp bilerler. Aralyk duralgalaryň hiç birinde awtobusa ýolagçy alynmaz.

Her bir ýolagçy awtomenzile girmezden ýa-da awtobusa münmezinden öň bedeniniň gyzgyny ölçenilip, antiseptiki serişdeler bilen elleri zyýansyzlandyrylar, awtomenzilde we awtobusda agyz-burun örtüklerini ulanmak, kesgitlenen aralygy saklamak bilen jemgyýetçilik gigiýenanyň düzgünlerini berjaý etmek talap ediler.

Ýolagçylaryň ýol petegi we degişli saglyk kepilnamasy bolmadyk we bedeniniň gyzgyny ýokary bolan ýagdaýynda, olaryň awtobuslara mündirilmegi gadagan ediler. Şäherara ugurlar boýunça gatnaýan awtobuslar diňe welaýatlaryň araçäklerinde ýerleşýän gara ýollaryň ugrundaky gözegçilik nokatlarynda saklanylyp we ol ýerdäki topar tarapyndan ýolagçylaryň degişli resminamalary barlanylyp bilner, şol wagtda sürüji awtobusyň içini ýelejireder.

Türkmenistan Içeri işler ministrliginiň jemgyýetçilik howpsuzlyk bölümi, Türkmenistanyň Saglygy goraýyş we derman senagaty ministrliginiň Döwlet arassaçylyk we keselleriniň ýaýramagyna garşy göreşmek gullugy we «Türkmenawtoulaglary» agentliginiň «Türkmenulaggözegçilik» döwlet kärhanasy tarapyndan tertip düzgüniň we jemgyýetçilik gigiýena düzgünleriniň berjaý edilişine gözegçilik ediler.

Awtobuslaryň rejesi bilen şu salgy arkaly tanşyp bilersiňiz.

Teswirler
Teswir ýazmak üçin içeri giriň ýa-da registrasiýa boluň