Özbegistanyň futbol çempionatynyň 4-nji tapgyrynda Nawoýi şäheriniň «Kyzylkumy» türkmenistanly baş tälimçi Täçmyrat Agamyradowyň ýolbaşçylygyndaky ilkinji duşuşygyny geçirdi. Düzüminde milli ýygyndymyzyň kapitany Arslanmyrat Amanow hem bolan AGMK bilen duşuşan «Kyzylkum» 0:1 hasabynda garşydaşyndan ýeňildi. Duşuşykdaky ýeke-täk pökgini 66-njy minutda Elguja Grigalaşwili geçirdi.
Duşuşygyň netijesi boýunça utugyny 8-e çykaran AGMK dördünji orna çykdy, 1 utukly «Kyzylkum» bolsa 12-nji basgançakda galdy.
«Kyzylkumyň» düzüminde türkmenistanly futbolçylar Wezirgeldi Ylýasow bilen Abdy Bäşimowyň başdan-aýaga oýnandygyny aýtmak gerek. Abdy Bäşimow 72-nji minutda eminden sary duýduryş kartyny hem aldy. AGMK-niň ätiýaçdaky düzümine girizilen hem bolsa Arslanmyrat Amanow duşuşyga gatnaşmady.
