«Ahal» we «Aşgabat» futbol toparlary gyşky taýýarlyk işleriniň çäginde özara ýoldaşlyk duşuşygyny geçirdiler.
Duşuşyk «Aşgabat» köpugurly sport toplumynyň ýanaşyk meýdanlarynyň birinde geçirildi. Türkmenistanyň Futbol federasiýasynyň resmi saýtynda habar berlişi ýaly, ýoldaşlyk duşuşygy 2:2 hasabyndaky deňlik bilen tamamlandy. Duşuşykda «Ahalyň» pökgüleri toparyň düzümine täze goşulan futbolçylar Myrat Ýagşyýew bilen Ilýa Tamurkin geçirdi.
«Türkmennebitönümleri» baş müdirliginiň toparynyň 5-nji we 12-nji fewralda AFK-nyň kubogy ― 2020-niň saýlama tapgyrynyň çäginde Gyrgyzystanyň «Nebitçi» topary bilen duşuşjakdygyny ýatladýarys. Bu jübütleriň ýeňijisi Täjigistanyň çempionatynyň kümüş medalynyň eýesi «Hujand» bilen hem saýlama duşuşyklary geçirer.
