Arhiw

Türkmenistanly gandbolçy gyzlar yklym ýaryşyna gatnaşmaga hukuk gazandy

12:2613.05.2019
0
12281

Türkmenistanyň gandbol boýunça 17 we 19 ýaşa çenli zenanlar ýygyndylary ýakynda Mongoliýanyň paýtagty Ulan-Bator şäherinde geçirilen “Trophy” halkara ýaryşynyň Merkezi Aziýa bölegine gatnaşdy. Bu ýaryş Halkara gandbol federasiýasynyň ýyllyk meýilnamasyndan orun alyp, ol ilki sebitler, soňra yklymlar we iň soňunda dünýä derejesinde geçirilýär.

Halkara ýaryşda ýurdumyzyň 17 ýaşa çenli ýetginjekler ýygyndysyna Diana Ýeremeýewa, Anna Begjanowa, Tahira Mursalowa, Gülnabat Annadurdyýewa, Alina Rodenko, Täzegül Serdarowa, Aýşa Amanberdiýewa, Jennet Geldiýewa we Aýnur Gelenjäýewa dagylar wekilçilik etdiler. Ulan-Bator şäherindäki "Buyant Ukhaa" sport toplumynda geçirilen duşuşyklarda ýer eýelerini 33:27, ikinji duşuşykda gyrgyz türgenlerini 34:9, Täjigistanyň ýygyndysyny 45:5 hasabynda ýeňen ildeşlerimiz diňe özbegistanly gandbolçylardan asgyn geldiler (22:37). Şeýlelikde, olar dört duşuşykda 6 utuk toplap, ikinji orny eýelediler.

Aýparça Rejebowadan, Melike Gurbanowadan, Tamila Aliýewadan, Denisa Ýekewowadan, Maýsa Reýimowadan, Jennet Gullyýewadan, Sabina Röwşenowadan, Muhaýa Ysmaýylowadan we Merýem Alyýewadan ybarat 19 ýaşa çenli ýaşlar ýygyndymyz hem edil şeýle netijäni görkezdi. Täjik (62:9), gyrgyz (67:4) we mongol (39:28) türgenlerinden üstün çykan türkmenistanly gyzlar bu gezek hem özbegistanly garşydaşlaryndan asgyn geldiler (20:43). Ýaşlar ýygyndymyz hem ýaryşda 6 utuk toplap, ikinji orny eýeledi.

Şeýlelikde, halkara ýaryşyň 7 - 11-nji maý aralygynda geçirilen Merkezi Aziýa böleginde türkmenistanly gandbolçy zenanlar juda üstünlikli çykyş edip, ikinji tapgyra - ýaryşyň yklymlaýyn bölegine gatnaşmaga hukuk gazandylar. Halkara ýaryşyň düzgünnamasyna görä, sebitleýin bölekde birinji we ikinji orunlary eýelän ýygyndylar ýaryşy dowam etdirmäge hukuk gazanýar. Ildeşlerimiziň bu üstünligini yklym ýaryşynda hem dowam etdirjekdigine ynanýarys.

Teswirler
Teswir ýazmak üçin içeri giriň ýa-da registrasiýa boluň