Bu möhüm oba hojalyk möwsümi Ahal, Lebap we Mary welaýatlarynda badalga aldy. Toprak-howa şertlerine görä, Daşoguz welaýatynda pagta ýygymyna 16-njy sentýabrda girişiler.
Şu ýyl Türkmenistanda “ak altynyň” 1 million 50 müň tonnasyny, şol sanda Ahal welaýatynda 207 müň tonnasyny, Daşoguz welaýatynda 230 müň tonnasyny, Lebap welaýatynda 300 müň tonnasyny, Mary welaýatynda 313 müň tonnasyny taýýarlamak maksat edinilýär. Gowaça ýetişdirmek üçin bölünip berlen ýeriň umumy meýdany 545 müň gektara deňdir. Ýaz aýlary şol ýerlerde inçe süýümli pagtanyň “Ýolöten — 7”, “Daşoguz — 120”, “Serdar”, “Sagdynlygyň we ruhubelentligiň ýyly — 4727”, “Ýolöten — 39”, “Ýolöten — 14”, “Jeýhun”, “Sagdynlygyň we ruhubelentligiň ýyly — 2606” we beýleki tohumlary ekildi.
Häzirki möwsümiň aýratynlygynyň käbir tehnologik işleriň mehanizasiýasynyň we awtomatizasiýasynyň ýokary derejesinden ybaratdygyny ýene-de bir gezek nygtamak isleýäris. Pagta ýygmakda 1 müň 76 pagta ýygyjy kombaýnlar hereket eder, ýagny munuň özi 2016-njy ýyldakydan 2,5 esse köpdür. Meýdanlara 2 müň 260-dan gowrak awtoulag, 2 müň 162 traktor hem-de pagtany daşamaga niýetlenen tirkeg traktorlarynyň 3 müň 325-si çykarylar.
Gowaçanyň täze hasylyny kabul etmäge kärhanalaryň 156-sy hem-de pagta arassalaýjy zawodlarynyň 38-si taýýar edildi. Şolaryň ýanyndaky barlaghanalarda “Türkmenstandartlary” döwlet gullugynyň hünärmenleri pagtanyň hiline düýpli barlagyň geçirilmegini üpjün ederler.
Öňdebaryjy kärendeçi pagtaçylaryň, mülkdarlaryň, daýhanlaryň, kombaýnçylaryň hem-de sürüjileriň zähmetini höweslendirmek üçin 2018-nji ýylyň pagta ýygymy möwsüminde Agrar partiýanyň Merkezi geňeşi, Demokratik partiýanyň Syýasy geňeşi hem-de beýleki jemgyýetçilik guramalary, Oba we suw hojalyk ministrligi, “Daýhanbank” döwlet täjirçilik banky, “Galkynyş”, “Nesil” hem-de “Bereketli toprak” gazetleriniň redaksiýalary däbe öwrülen bäsleşigi geçirýärler.
