Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türki döwletleriň guramasynyň Aksakgallar geňeşiniň başlygy Binaly Ýyldyrymyň çakylygy boýunça Aksakgallar geňeşiniň agzasy, şeýle hem hormatly myhman hökmünde Geňeşiň 16-njy mejlisine gatnaşmak maksady bilen, Wengriýa iş sapary bilen ugrady.
TDH-niň habar bermegine görä, paýtagtym Halkara howa menzilinde Gahryman Arkadagy ýurduň resmi adamlary ugratdylar.
Türkmenistanyň Wengriýa bilen ikitaraplaýyn gatnaşyklary barada aýdylanda bolsa, diplomatik gatnaşyklaryň ýola goýlan döwründen bäri birek-birege hormat goýmak esasynda guralýan döwletara hyzmatdaşlygyň yzygiderli pugtalandyrylýandygyny bellemek gerek. şunda ýokary we hökümet derejesindäki duşuşyklara aýratyn ähmiýet berilýär. Wengriýanyň Prezidentiniň 2011-nji ýylda Türkmenistana hem-de dostlukly ýurduň Premýer-ministriniň 2023-nji ýylda Aşgabada amala aşyran resmi saparlarynyň, şeýle hem Gahryman Arkadag Gurbanguly Berdimuhamedowyň 2014-nji ýylda Wengriýa resmi saparynyň hem-de hormatly Prezident Serdar Berdimuhamedowyň 2023-nji ýylda Budapeşte amala aşyran iş saparynyň netijeleri munuň aýdyň subutnamasydyr.
Gahryman Arkadagyň uçary Budapeşte çenli uçuşy amala aşyryp, dostlukly ýurduň paýtagtynyň Ferents List adyndaky halkara howa menziline gondy. Bu ýerde Türkmenistanyň Halk Maslahatynyň Başlygy Gurbanguly Berdimuhamedowy resmi adamlar garşyladylar.
