Türkmenistanyň daşary işler ministri Raşid Meredow bilen Birleşen Milletler Guramasynyň Azyk we oba hojalygy guramasynyň (FAO) Baş direktoryň orunbasary, Ýewropa we Merkezi Aziýa boýunça sebit wekili Wiorel Gusunyň arasynda duşuşyk geçirildi. Bu barada Türkmenistanyň DIM-niň resmi saýtynda habar berildi.
28-nji noýabrda bolan duşuşykda Türkmenistan bilen FAO-nyň arasyndaky hyzmatdaşlygyň esasy ugurlary ara alnyp maslahatlaşyldy. Taraplar bilelikdäki taslamalarydyr maksatnamalary işläp taýýarlamak we durmuşa geçirmek barada pikir alyşdylar.
Howanyň üýtgemegi çygrynda azyk howpsuzlygy boýunça ikinji maslahatyň ähmiýeti bellenilip, onuň azyk howpsuzlygyny üpjün etmek ýaly möhüm ugurda sebit we global hyzmatdaşlygyň meselelerini ara alyp maslahatlaşmak üçin açyk meýdança öwrüljekdigi nygtaldy.
Şunuň bilen baglylykda, howanyň üýtgemeginiň oba hojalygyny alyp barmakdaky däp bolan tejribä üýtgeşmeleri girizýändigi, munuň bolsa dessin çäreleriň görülmegini talap edýändigi bellenildi.
Taraplar Türkmenistanda FAO-nyň edarasyny açmak üçin çäreleri güýçlendirmäge taýýardyklaryny hem mälim etdiler diýlip, habarda bellenilýär.
