Türkmenistanyň Prezidenti obasenagat toplumynyň meseleleri boýunça iş maslahatyny geçirdi, Türkmenistanda Özbegistan Respublikasynyň Medeniýet günleri badalga aldy, Russiýa Türkmenistanyň ýokary okuw mekdeplerine 1000-den gowrak okuw-usuly kitaplaryny iberer we beýleki habarlar
Türkmenistanda
1. Prezident Serdar Berdimuhamedow ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda Türkmenistanyň oba hojalyk toplumyny ösdürmek, welaýatlarda alnyp barylýan möwsümleýin işleriň barşy hem-de Oba milli maksatnamasynyň ýerine ýetirilişi bilen baglanyşykly meselelere garaldy. Döwlet Baştutany welaýatlarda ýetişdirilen pagtany iň soňky hanasyna çenli ýygnap almak üçin geçirilýän işlere berk gözegçilik etmegiň, ýygymda kombaýnlaryň we beýleki tehnikalaryň, pagta arassalaýjy kärhanalaryň hem-de kabul ediş harmanhanalarynyň doly güýjünde we netijeli işledilmeginiň möhümdigini belledi.
2. Aşgabatdaky Mukamlar köşgünde Özbegistan Respublikasynyň Türkmenistandaky Medeniýet günleriniň açylyş dabarasy boldy. Çykyş edenler iki ýurduň ynsanperwer hyzmatdaşlykda ýeten derejesini hem-de şeýle medeni çäreleriň ähmiýetini bellediler. Şu gezekki döredijilik çäresi hem munuň aýdyň güwäsidir. Soňra dabara özbek sungat ussatlarynyň konserti bilen dowam etdi. Dabaranyň myhmanlary binanyň eýwanynda ýaýbaňlandyrylan g amaly-haşam sungatynyň eserleriniň sergisi bilen tanyşdylar. Medeni çäräniň çäklerinde Türkmenistanyň Döwlet kitaphanasynda Türkmenistanyň we Özbegistanyň ýazyjylarynyň we şahyrlarynyň Magtymguly Pyragynyň döredijilik mirasyna bagyşlanan duşuşygy geçiriler.
3. Russiýa Türkmenistanyň ýokary okuw mekdeplerine 1000-den gowrak okuw-usuly kitaplaryny iberer. Bu barada RF-iň Türkmenistandaky ilçihanasynyň birinji sekretary Ýuliýa Zaýsewa habar berdi. Rus tarapy türkmen tarapy bilen ylalaşyp, türkmen ýokary okuw mekdeplerine ylmy-usulyýet edebiýatlaryny, şol sanda rus dilini daşary ýurt dili hökmünde öwretmek bilen bagly kitaplary, meşhur ylmy-köpçülikleýin edebiýatlary we çeper eserleri, şeýle-de dürli hünärlere ýöriteleşdirilen sözlükleri iberer.
4. Aşgabatdaky «Dante» restoranynda meşhur italýan aşpezlerinden ussatlyk sapagy geçirildi. Bu çäre Italiýanyň Türkmenistandaky ilçihanasy tarapyndan IX Italýan aşhanasynyň hepdeliginiň çäklerinde guraldy. Türkmenistana Italiýanyň üç meşhur aşpezi ýörite iş sapary bilen geldi, aşhana sungatynyň ussatlary Italýanyň milli baýdagynyň reňklerine kybapdaş bolan üç sousyň: pesto (ýaşyl), beşamel (ak) we tomatly (gyzyl) souslary bişirmegiň tapgyrlaýyn taýýarlanyş usulyny görkezdiler.
5. Türkmenistanyň Döwlet daşary ykdysady iş banky müşderilerine halkara pul geçirimleriniň amatly we ygtybarly ulgamyny hödürleýär. Halkara pul geçirimleri hyzmatyny ulanmak üçin bankyň hünärmenlerine ýüz tutup ýa-da tfeb.gov.tm resmi saýtyna girip, giňişleýin maglumat alyp bilersiňiz.
6. 29-njy noýabrda Amerikan merkezinde «TechGirls-2025» maksatnamasyna bagyşlanan maglumat sessiýasy geçiriler. Bu Türkmenistanda hem hereket edýän halkara alyş-çalyş maksatnamasy bolup, gyzlara «STEM» ugry boýunça hünär ýoluny dowam etdirmäge mümkinçilik berýär. Bu maksatnama orta mekdepleriň ýokary synp okuwçy gyzlaryna (15-17 ýaş aralygy) ABŞ-da tomusky alyş-çalyşlara gatnaşmaga mümkinçilik döredýär, bu ýerde olar seminarlar, terbiýeçilik we tejribelik işleri arkaly tehniki başarnyklary, ýolbaşçylyk ukyplaryny öwrenerler we amaly tejribe toplarlar. Maksatnama gatnaşmak üçin arza tabşyrmagyň ahyrky möhleti 6-njy dekabr.
Dünýäde
7. Hytaý – Merkezi Aziýa gaz geçirijisiniň hereket eden 14 ýyldan gowrak döwrüniň dowamynda Hytaýa 500 milliard kub metrden gowrak tebigy gaz berildi. Bu energiýanyň möçberi 666 million tonna kömür ulanmaga deňdir, bu bolsa kömürturşy gazynyň zyňyndylaryny 731 million tonna möçberde azaltmaga mümkinçilik döretdi. Uzynlygy 1833 km we taslama kuwwaty ýylda 60 milliard kub metr gaz bolan gaz geçirijisi 2009-njy ýylyň dekabrynda işe girizildi. Bu turbageçiriji Hytaýyň ilkinji transmilli gaz geçirijisi bolmak bilen, Türkmenistan bilen Özbegistanyň serhedinden gözbaş alyp, Özbegistanyň we Gazagystanyň çäginden geçýär hem-de Hytaýyň Günbatar-Gündogar gaz geçirijisi bilen birleşýär.
Sport täzelikleri
8. «Altyn Asyr» futbol boýunça Türkmenistanyň çempionatynyň 26-njy tapgyrynyň yza süýşürilen oýnunda «Merwden» utuldy. Maryda geçirilen duşuşyk ýer eýeleriniň peýdasyna 1:0 hasabynda tamamlandy. Ýeňijilerden 34-nji minutda Guwanç Berdimyradow tapawutlandy. «Merw» 32 utuk bilen çempionlyk sanawynda bäşinji orny eýeleýär, «Altyn Asyr» (56 utuk) ikinji ýerde barýar.
9. Horwatiýanyň we Daniýanyň milli ýygyndylary, degişlilikde Portugaliýa we Serbiýanyň toparlary bilen deňme-deň oýnadylar, şonuň netijesinde öz toparçalarynda ikinji orny kepillendirdiler hem-de UEFA-nyň Milletler ligasynyň pleý-off tapgyryna gatnaşmak üçin soňky ýollanmalary gazandylar. A liganyň toparçalaýyn tapgyry ähli orunlar möhletinden öň kesgitlenen 3-nji toparçadaky oýunlar bilen sişenbe güni tamamlanar. Toparçalarynda ilkinji orunlary gazanan Portugaliýanyň, Fransiýanyň, Germaniýanyň we Ispaniýanyň milli ýygyndylary çärýek finala çykdylar. Ikinji orunlary horwatlardan we daniýalylardan başga-da, Italiýanyň we Niderlandlaryň toparlary eýeledi. Çärýek final tapgyrynyň bije çekişligi 22-nji noýabrda Nýonda (Şweýsariýa) geçiriler.
