Eýran Yslam Respublikasynyň Aşgabatdaky Ilçihanasy türkmen telekeçilerini dag-magdan senagatynyň, ýerasty baýlyklaryň we ýol gurluşygynyň 10-njy halkara sergisine gatnaşmaga çagyrýar. Bu iri çäre 2024-nji ýylyň 23-26 noýabry aralygynda Tähranda geçiriler.
Türkmenistanyň Senagatçylar we telekeçiler birleşmesiniň habar bermegine görä, sergi guramaçylary türkmen gatnaşyjylaryna ýörite şertleri, şol sanda dört ýyldyzly myhmanhana üç gije-gündizlik mugt ýerleşmegi, naharlanmagy we şäher içi ulagy hödürleýär. Mundan başga-da, çäräniň çäklerinde iki ýurduň işewür toparlarynyň wekilleriniň täze hyzmatdaşlyk aragatnaşyklaryny ýola goýup biljek Biznes-forumy hem meýilleşdirilýär.
Gyzyklanýan telekeçiler sergä gatnaşmak üçin TSTB ýüz tutmaly. Goşmaça maglumaty serginiň www.iranconmine.com resmi web sahypasyndan alyp bolar.
Bu çäre senagat we tehnologiýalar ulgamynda türkmen-eýran söwda-ykdysady hyzmatdaşlygyny giňeltmek üçin täze mümkinçilikleri açýar.
