24-nji sentýabrda Minsk şäherinde GDA agza ýurtlaryň Arkalaşygyň kanuny we beýleki edaralaryndaky hemişelik ygtyýarlandyrylan wekilleriniň Geňeşiniň nobatdaky mejlisi geçirildi. Onuň dowamynda şu ýylyň 7-8-nji oktýabrynda Moskwada geçiriljek GDA-nyň daşary işler ministrleriniň Geňeşiniň hem-de GDA-nyň döwlet Baştutanlarynyň Geňeşiniň mejlislerine taýýarlyk görmek bilen bagly meseleler ara alnyp maslahatlaşyldy. Bu barada Arkalaşygyň resmi saýtynda habar berilýär.
Bellenilişi ýaly, GDA-nyň daşary işler ministrleriniň Geňeşiniň nobatdaky mejlisiniň gün tertibinde 21 sany mesele orun alar, şeýle-de halkara giňişlikdäki özara gatnaşyklar we ynsanperwer hyzmatdaşlyk bilen bagly resminamalaryň 23 sanysynyň taslamasyna garalar. GDA-nyň döwlet Baştutanlarynyň Geňeşiniň nobatdaky mejlisinde bolsa 17 sany mesele we 17 sany resminamanyň taslamasy ara alnyp maslahatlaşylar.
Mejlise Türkmenistanyň Belarus Respublikasyndaky Adatdan daşary we Doly ygtyýarly ilçisi, Türkmenistanyň Garaşsyz Döwletleriň Arkalaşygynyň kanuny we beýleki edaralaryndaky hemişelik ygtyýarlandyrylan wekili Nazarguly Şagulyýew gatnaşdy.
