Türkmenistanly ýetginjek agyr atletikaçylar 17 ýaşa çenli türgenleriň arasynda geçirilen Merkezi Aziýanyň açyk çempionatynda dürli derejeli medallaryň 13-sine mynasyp boldular. Özbegistanyň Çyrçyk şäherinde geçirilen sebit ýaryşyna alty döwletden ― Gazagystandan, Gyrgyzystandan, Täjigistandan, Türkiýeden, Türkmenistandan we Özbegistandan 44 türgen gatnaşdy.
Ýaryşda türkmenistanly türgenleriň gazanan medallarynyň 11-si kümüş, ikisi bolsa bürünç medallardyr.
Hususan-da, 49 kilograma çenli agram derejesinde çykyş eden Atabek Azamatowyň, 67 kilograma çenli agram derejäniň wekili Kakamyrat Annamyradowyň we 55 kilograma çenli agram derejesinde ýaryşan Orazgül Babanyýazowanyň ştangany galdyrmagyň iki görnüşi we olaryň jemi boýunça kümüş medallaryň üçüsini eýeländigini nygtamak gerek. Başgaça aýtsak, ýygyndy toparymyzyň medallarynyň 9-syny şu üç türgen gazandy.
Gyzlaryň arasynda 71 kilograma çenli agram derejesinde ýaryşan Gurbangözel Orazowa hem hormat münberine üç gezek çykdy. Ýöne ol beýleki ildeşlerimizden tapawutlylykda, öz çykyşyny kümüş medallaryň ikisi we bir sany bürünç medal bilen tamamlady. Türkmen ýetginjekleriniň 13-nji medaly bolsa 81 kilograma çenli agram derejesinde çykyş eden Saparbaý Atajanowdan geldi.
Ýurdumyzda kemala gelýän kämil agyr atletika mekdebiniň ýaş wekilleriniň gazanan bu üstünligi ýylyň dowamynda gazanylan ozalky ýeňişleriň üstüni ýetirdi. Şu günler türkmen agyr atletikaçylary has iri ýaryşlaryň hem bosagasynda dur. Olaryň iň esasysy hökmünde bolsa ýakyn günlerde badalga beriljek Tomusky Olimpiýa oýunlaryny görkezip bolar. Çünki agyr atletika bu Oýunlaryň taryhynda türkmen türgenleriniň medal gazanan ýeke-täk sport görnüşidir. Parižde geçiriljek Oýunlarda hem ildeşlerimiziň medal gazanmak mümkinçiligi ýokary.
