Hytaý kompaniýasy «Weichai Holding Co. Ltd» Türkmenistanyň bazaryna girýär. 26-njy fewralda «Balkan» gämi gurluşyk we gämi abatlaýyş zawodynyň wekilleri bilen «Weichai Holding» kompaniýasynyň müdiriniň we täjirçilik menejeriniň arasynda duşuşyk geçirildi. Duşuşykda taraplar Türkmenistanyň Deňiz söwda flotunyň «S.Nyýazow» gury ýük gämisi üçin zerur enjamlary we ätiýaçlyk şaýlaryny satyn almak meselesini ara alyp maslahatlaşdylar.
Hususan-da, hytaý kompaniýasynyň wekillerine «S.Nyýazow» gury ýük gämisi üçin zerur bolan esasy hereketlendirijiniň we dizel generatorlarynyň tehniki aýratynlyklary we çyzgylary berildi. Zawodyň wekilleri bu gury ýük gämisi üçin satyn alnan enjamlaryň halkara ülňülere laýyklykda kepillendirilmelidigini hem bellediler.
Duşuşygyň ahyrynda hytaý kompaniýasynyň «Balkan» gämi gurluşyk we gämi abatlaýyş zawodynyň tekliplerine garajakdygy bellenildi we ikitaraplaýyn hyzmatdaşlygyň ýola goýuljakdygyna ynam bildirildi.
