Germaniýanyň «Transfermarkt» statistika portaly Türkmenistanyň milli ýygyndysynyň agzalary bolan derwezeçi Rahat Japarowy, ýarymgoragçy Mirza Beknazarowy hem-de hüjümçi Şamämmet Hydyrowy «Arkadag» futbol klubynyň düzümine goşdy.
28 ýaşly Rahat Japarow mundan ozal «Ahal» toparynda çkyş edýärdi. Ol topary erkin agent hökmünde terk etdi. «Transfermarkt» portaly derwezeçiniň transfer bahasyny 100 müň ýewro möçberde bahalaýar. Ol «Ahaldan» ozal Gyrgyzystanyň «Abdyş-Ata» toparynyň düzüminde oýnap, 2022-nji ýylda Gyrgyzystanyň çempionatynyň «iň gowy derwezeçisi» diýen ada mynasyp boldy. Şeýle-de ol 2021-nji ýylda Duşenbe şäheriniň «SSKA» toparynda oýnap, 2021-nji ýylda Täjigistanyň çempionatynyň «iň gowy derwezeçisi» diýlip ykrar edildi.
23 ýaşly Mirza Beknazarow 2019-njy ýylda Türkmenistanyň milli ýygyndysynda debýut etdi. Şeýle-de onuň AFK Kubogynda we AFK-nyň Çempionlar ligasynda hem tejribe toplandygyny bellemek gerek. M.Beknazarow 2022-nji ýylda «Ahalyň» düzüminde çykyş edip, şol möwsümde Türkmenistanyň Ýokary ligasynyň nusgawy ýygyndysyndan orun aldy. «Transfermarkt» portaly M.Beknazarowyň transfer nyrhyny 100 müň ýewro möçberde bahalaýar.
23 ýaşly Şamämmet Hydyrow 2023-nji ýylda «Köpetdagyň» düzüminde çykyş edip, Türkmenistanyň Ýokary ligasynda 8 gola awtorlyk etdi. «Transfermarkt» portaly Ş.Hydyrowyň transfer nyrhyny 50 müň ýewro möçberde bahalaýar.
Ýeri gelende bellesek, «Arkadag» topary häzirki wagtda Türkiýäniň Antalýa şäherinde okuw-türgenleşik ýygnanyşygyny geçirýär. Topar okuw-türgenleşik ýygnanyşygynyň çäklerinde birnäçe ýoldaşlyk duşuşyklary geçirer. Şolaryň biri hem 10-njy fewralda Ukrainanyň «Dnepr-1» topary bilen bolar.
