Türkmenistanyň milli ýygyndysynyň hüjümçisi Meýlis Diniýew Mogilev Cup ― 24 ýoldaşlyk ýaryşynda Minskiň «Dinamosynyň» derwezesinden gol geçirdi. Bu barada «Belarusskiý» futbol habar berýär.
«Gomelde» gözden geçirilýän 23 ýaşly hüjümçi duşuşygyň 40-njy minutynda tapawutlandy. Duşuşyk bolsa «Dinamonyň» 3:1 hasabyndaky ýeňşi bilen tamamlandy.
2022-nji ýylda «Ahalyň» düzüminde Türkmenistanyň çempiony bolan Meýlis Diniýewiň şu günler «Gomelde» synagdan geçirilýändigini ozal habar beripdik. Meýlisiň milli ýygyndyda bir, ýaşlar ýygyndysynda bolsa üç oýunlyk tejribesi bar. Şeýle hem ol «Ahal» bilen iki ýyllap AFK-nyň Çempionlar ligasynyň duşuşyklaryna gatnaşdy.
«Gomel» Belarusyň Ýokary ligasyny geçen ýyl altynjy orunda tamamlady. 2003-nji ýylda ýurduň çempiony bolan topar taryhynda üç gezek Belarusyň kubogyny hem gazandy.
Topar öz meýdanyndaky duşuşyklaryny Gomel şäheriniň «Merkezi» stadionynda geçirýär. Häzirki wagtda «Gomel» tälimçi Andreý Gorowsowyň ýolbaşçylygynda türgenleşýär.
