«Sony Pictures Entertainment» kompaniýasy Los-Anjelesdäki täze binasyny Golliwudyň meşhur kompozitory Jon Wilýamsyň hormatyna atlandyrdy diýip, «Variety» saýtyna salgylanýan Daily.afisha.ru habar berýär.
Wilýams «Oskar», «Gremmi» hem-de «Emmi» ýaly abraýly baýraklaryň eýesidir. Ol «Ýyldyz söweşijileri», «Eňekler», «Ýura eýýamynyň seýilgähi» hem-de «Garri Potter» ýaly kult derejesine ýeten filmleri üçin aýdymlary ýazdy.
Kompozitor «Oskar» baýragynyň iň köp gezek dalaşgäri bolup (53 gezek), bu ugurda özboluşly reskorda eýedir.
«Bu studiýa ilkinji gezek 1940-njy ýylda kakam bilen gelip görüpdim. Şol mahal 9 ýa 10 ýaşymdadyryn. Şonda: «Bir gün bu zatlaryň hemmesi meniňki bolar» diýip pikir edipdim. Ahyrsoňunda bu şeýle-de boldy, bu arzuwyma ýetmegim üçin bary-ýogy 92 ýyl gerek boldy. Geljekki 100 ýylda hem geçen ýüzýyllykdakydan mümkin boldugyça gowy sazlary döredip bilerin diýip umyt edýärin» — diýip, Wilýams dabaranyň dowamynda belledi.
Binanyň açylyş dabarasyna režissýor Stiwen Spilberg hem-de JJ Abrams ýaly Wilýamsyň köpden bäri işleşip gelýän meşhur kärdeşleri gatnaşdy.
Ýaşyna uludygyna garamazdan, 92 ýaşly Wilýams häzirlikçe pensiýa çykmagy meýilleşdirmeýär. Ol henizem filmler we beýleki taslamalar üçin sazlary ýazmagy dowam etdirmegi maksat edinýär.
