«Aşgabat şäher telefon ulgamy» (AŞTU) ýapyk görnüşli paýdarlar jemgyýeti müşderilere telefon, internet we IPTV hyzmatlarynyň tölegini amatly hem-de ygtybarly tölemäge mümkinçilik berýän täze «eKassa» atly ykjam programmasyny işe girizdi.
AŞTU-nyň habar bermegine görä, «eKassa» astu.tm saýtyndaky «Şahsy otag» köp hyzmatly platformanyň ýönekeýleşdirilen görnüşidir. Ozal hyzmatlaryň tölegini tölemek üçin ýörite şahsy deňeşdirme koduny almak talap edilýän bolsa, indi täze programmada hasaba alnanyňyzda ykjam telefon belgiňizi görkezmek ýeterlikdir.
«eKassa» ykjam programmasynyň döwrebap we düşnükli interfeýsi bar. Ulanyjylar bank kartlaryny birikdirip, şeýle hem AŞTU-nyň dürli hyzmatlary üçin tölegleri dolandyryp bilerler.
«eKassa» ykjam programmasynyň işe girizilmegi AŞTU-nyň müşderileri üçin iň amatly we ygtybarly hyzmatlary döretmek ugrundaky nobatdaky ädimidir. Ykjam programma eýýäm «Google Play» we «App Store» programma dükanlarynda ýükläp almak üçin elýeterlidir.
