Gonkongyň «Kitçi» futbol toparynyň türkmenistanly ýarym goragçysy Ruslan Mingazow 2024-nji ýyla üstünlikli başlady. 32 ýaşly futbolçynyň topary 1-nji ýanwar güni täze ýyldaky ilkinji kubogyna ― Gonkongyň Premýer-ligasynyň komitetiniň kubogyna (HKPLC Cup ― 2023/24) mynasyp boldy.
Esasy wagty 2:2 hasabyndaky deňlik bilen tamamlanan final duşuşygynda «Kitçi» geçen möwsümiň wise-çempiony «Li Man» toparyny 11 metrlik jerime urgularynyň netijesinde 5:4 hasaby bilen ýeňdi. Esasy düzümde meýdana çykan Ruslan Mingazow duşuşygyň 14-nji minudynda tapawutlandy.
«Kitçi» finala barýan ýolda 28-nji dekabr güni «Istern» toparyny 5:0 hasabynda ýeňipdi. Mingazow şol duşuşykda hem esasy düzümde meýdana çykyp, tapawutlanmagy başarypdy.
Bu ýaryş Gonkongyň Premýer-ligasynyň döredilmeginiň 10 ýyllygy mynasybetli geçirildi. Oňa geçen möwsümiň iň güýçli dört topary gatnaşdy. Çempionyň 80 müň gonkong dollaryna mynasyp bolan ýaryşynda finalça 40 müň gonkong dollary möçberinde baýrak berildi.
