Şu gün Türkmenistanyň Prezidenti Serdar Berdimuhamedow bilen Eýran Yslam Respublikasynyň Prezidenti Seýed Ebrahim Raisiniň arasynda telefon arkaly söhbetdeşlik boldy.
«Watan» habarlar gepleşiginde habar berlişi ýaly, telefon arkaly söhbetdeşlik eýran tarapynyň başlangyjy boýunça geçirildi.
Söhbetdeşligiň barşynda döwlet Baştutanlary iki ýurduň arasynda ýola goýlan netijeli gatnaşyklaryň häzirki wagtda ikitaraplaýyn derejede hem-de halkara guramalaryň çäklerinde, däp bolşy ýaly, birek-birege hormat goýmak we özara ynanyşmak esasynda ösdürilýändigini kanagatlanma bilen bellediler. Şeýle-de özara saparlaryň dowamynda gazanylan ylalaşyklary iş ýüzünde amala aşyrmak üçin iki tarapyň hem uly tagalla edýändigi barada aýdyldy.
– Biz bu gün birnäçe ugurlarda anyk netijeleriň gazanylýandygyny görýäris – diýip, Türkmenistanyň Prezidenti kanagatlanma bilen belledi.
Söhbetdeşlikde söwda-ykdysady ulgamdaky hyzmatdaşlyk türkmen-eýran gatnaşyklarynyň ileri tutulýan ugurlarynyň hatarynda görkezildi. Ykdysady hyzmatdaşlyk boýunça bilelikdäki türkmen-eýran hökümetara toparynyň bu babatda möhüm ähmiýetiniň bardygy aýratyn bellenildi. Şunda 17-18-nji noýabrda Aşgabatda bu toparyň 17-nji mejlisiniň geçirilendigi, onuň çäklerinde Eýran Yslam Respublikasynyň ýöriteleşdirilen sergisiniň we türkmen-eýran işewürler forumynyň guralandygy hem bellenilip geçildi.
Telefon arkaly söhbetdeşlikde döwlet Baştutanlarynyň belleýşi ýaly, türkmen-eýran söwda-ykdysady gatnaşyklary üç sany esasy ugurda işjeň alnyp barylýar. Birinjiden, tebigy gaz pudagy bu hyzmatdaşlygyň esasy ugurlarynyň biridir. Bu babatda türkmen tebigy gazyny Eýrana we onuň çäklerinden SWAP görnüşinde üçünji ýurtlara ibermek meselesi barada bellemek bolar.
Şeýle-de söhbetdeşler elektrik energetikasy pudagynyň türkmen-eýran hyzmatdaşlygynyň ileri tutulýan ugurlarynyň hatarynda durýandygyny bellediler. Ulag pudagynyň döwletara hyzmatdaşlygyň ösmeginde giň orun tutýandygy barada aýdylyp, Türkmenistanyň bu ulgamda Eýran bilen özara hereketleriň giňeldilmegine hem-de ýük gatnawlarynyň artdyrylmagyna uly ähmiýet berýändigi nygtaldy. Şunda awtomobil ýollaryny gurmak babatda bilelikde işlemegiň oňyn tejribesiniň toplanandygy bellenildi.
Iki goňşy ýurduň döwlet Baştutanlary medeni-ynsanperwer ulgamdaky hyzmatdaşlyk barada hem durup geçip, 2024-nji ýylda tutuş dünýäde uly sarpa goýulýan ajaýyp türkmen şahyry we Gündogaryň beýik akyldary Magtymguly Pyragynyň doglan gününiň 300 ýyllygynyň hormatyna guraljak bilelikdäki möhüm çärelere ünsi çekdiler.
