Şu ýylyň 29-njy noýabrynda geçirilen CAREC Maksatnamasynyň ministrler derejesindäki 22-nji maslahatynyň çäklerinde Türkmenistanyň Zenanlar birleşiginiň Merkezi geňeşine, gender deňligini ilerletmek boýunça alyp barýan işleri üçin, köp ýyllar bäri ýurduň hyzmatdaşy bolan Aziýa ösüş bankynyň Merkezi Aziýa sebitinde Ykdysady Hyzmatdaşlyk (CAREC) Maksatnamasynyň medaly we degişli güwänamasy gowşuryldy.
«Watan» habarlar gepleşiginde habar berlişi ýaly, Türkmenistanyň Zenanlar birleşiginiň Merkezi geňeşi Azerbaýjanyň, Gazagystanyň, Gyrgyzystanyň, Gruziýanyň, Täjigistanyň, Özbegistanyň, Hytaýyň, Pakistanyň we Mongoliýanyň degişli guramalary bilen bir hatarda, Aziýa ösüş banky tarapyndan yglan edilen hem-de birnäçe tapgyrda geçirilen bäsleşige gatnaşdy.
Gruziýanyň paýtagty Tbilisi şäherinde geçirilen Zenanlaryň işewürlik maslahatynda gender deňligini hem-de jemgyýetde deňhukuklylygy ilerletmek boýunça ýokary netijeleri görkezen Türkmenistanyň Zenanlar birleşiginiň Merkezi geňeşine dabaraly ýagdaýda ýeňijiniň baýragy gowşuryldy.
