Şu gün Aşgabatda BMG-niň Türkmenistandaky Hemişelik utgaşdyryjysynyň wekilhanasynyň, Beýik Britaniýanyň, Demirgazyk Irlandiýanyň Birleşen Patyşalygynyň Türkmenistandaky ilçihanasynyň, Birleşen Arap Emirlikleriniň Türkmenistandaky ilçihanasynyň hem-de Türkmenistanyň Daşary işler ministrliginiň bilelikde guramagynda Howanyň üýtgemegi boýunça Türkmenistanyň ýaşlarynyň milli konferensiýasy (LCOY) geçirildi.
Foruma Türkmenistanyň dürli künjeklerinden gelen ýaşlaryň 200-den gowragy gatnaşdy.
Ýaşlar konferensiýasynyň (COY18) we Birleşen Milletler Guramasynyň Howanyň üýtgemegi baradaky Çarçuwaly konwensiýasynyň (COP 28) 28-nji sessiýasynyň öňüsyrasynda geçirilen çäräniň esasy maksady howanyň üýtgemegine garşy göreşde ýaşlaryň işjeňligini ýüze çykarmakdan, daşky gurşaw meselelerini milli we dünýä derejesinde çözmekden, Türkmenistanyň ýaşlaryny ekologik başlangyçlaryna işjeň gatnaşmaga höweslendirmekden ybaratdyr.
Her ýylda yzygiderli geçirilýän konferensiýanyň çäklerinde Daşoguz, Mary we Türkmenabat şäherlerinde sebitleýin ýygnaklar guraldy. Foruma gatnaşan durnukly ösüş maksatlarynyň ýaş ilçileri hem-de ekologiýa boýunça işjeňler sebitleriň ýaşlary bilen pikir alyşmaga we jemleýji konferensiýada öz taslamalaryny hödürlemäge mümkinçilik aldylar.
Ara alyp maslahatlaşmalaryň barşynda Türkmenistanyň ýaşlary howanyň üýtgemeginiň öňüni almak üçin global herekete işjeň gatnaşmak isleýändiklerini görkezdiler. Mundan başga-da, türkmen ýaşlary 2024-nji ýyl üçin Ýol kartasynyň bir bölegi hökmünde Türkmenistandaky geljekki taslamalar boýunça tekliplerini hödürlediler.
Maslahatda geçirilen pikir alyşmalaryň netijeleri esasynda Howanyň üýtgemegi boýunça Türkmenistanyň ýaşlarynyň milli konferensiýasynyň jemleýji beýany kabul edildi.
Türkmenistanyň ýaşlarynyň milli konferensiýasynyň jemleýji beýany COY18-de hödürlener we Dubaýda geçiriljek COP28-de resmi YOUNGO global nukdaýnazarynyň bir bölegi bolar.
***
Ýaşlar konferensiýasy (COY) — her ýyl howanyň üýtgemegi bilen baglanyşykly meseleleri ara alyp maslahatlaşmak we çözmek üçin dünýäniň dürli künjeginden gelen ýaşlary bir ýere jemleýän iri göwrümli çäredir. COY18 hem bu çäräniň on sekizinji konferensiýasy bolup, ol Birleşen Milletler Guramasynyň Howanyň üýtgemegi baradaky Çarçuwaly konwensiýasynyň (COP 28) 28-nji sessiýasynyň öňüsyrasynda ýaşlaryň işjeňleňligini artdyrmak üçin geçirilýän halkara platforma bolup hyzmat eder.
