Singapurda Kenarýakalaryny goramak we sil joşmalaryna durnuklylyk insitituty (CFI Singapore) açyldy. Ylmy merkez howanyň üýtgemegi bilen baglylykda deňziň suwunyň derejesiniň artmagyndan goranmak boýunça uzak möhletleýin çözgütleri gözlemek bilen meşgullanar diýip, «Reuters» habarlar gullugyna salgylanýan «Gazeta.ru» ýazýar.
Alymlar üstümizdäki ýüzýyllygyň ahyryna çenli deňziň derejesiniň ortaça bir metr ýokarlanjakdygyny çaklaýarlar, emma güýçli ygallar, suw joşmalary we deňiz harasatlary bilen baglylykda, howp has ýokary bolup biler.
Singapuryň çäginiň üçden bir bölegi deňiz derejesinden bäş metrden hem pes belentlikde ýerleşýär, ygalyň ortaçaýyllyk möçberi 2,5 müň mm-e deňdir, bu bolsa ada şäher-döwletinden sil joşmalaryna garşy göreşde has çynlakaý taýýarlygy talap edýär.
CFI Singapore ylmy merkeziniň hünärmenleri özleriniň esasy wezipesi hökmünde ýer ýetmezçiligini başdan geçirýän ýurduň ummanyň gury ýere süýşmegi netijesinde öz çäklerini ýitirmezligini gazanmakdygyny aýdýarlar.
