Ýaş maşgalalaryň durmuş we ýaşaýyş jaý şertlerini gowulandyrmak Türkmenistanyň, esasan hem Prezident Serdar Berdimuhamedowyň döwlet syýasatynyň esasy ugurlaryndan biridir.
Ozal Türkmenistanyň Prezidenti Serdar Berdimuhamedow 2022-nji ýylyň 23-nji sentýabrynda ýaş maşgalalaryň ýaşaýyş-durmuş şertlerini mundan beýläk-de has-da gowulandyrmak maksady bilen ýeňillikli karzlaryň möçberini köpeltmek boýunça Karara gol çekipdi.
Türkmenistanyň Döwlet daşary ykdysady iş bankynyň web sahypasynda bellenilşine görä, Türkmenistanda durmuş guran ýaş maşgalalar 3 ýyl möhlet bilen ýyllyk 1%-li 20 müň manada çenli karz pul serişdesinden peýdalanyp bilerler.
Bu karzy 35 ýaşa ýetmedik we Türkmenistanyň Prezidentiniň Türkmenistanda ýaş maşgalalaryň ýaşaýyş-durmuş şertlerini has-da gowulandyrmak hakynda 2022-nji ýylyň 23-nji sentýabrynda çykaran 267 belgili karary güýje gireninden soňra resmi taýdan nikalaşan ýaş maşgalalar alyp bilerler.
Maşgala karzyny almak üçin zerur resminamalar
Karz alyjy üçin:
- Karzy almak üçin arza
- Pasportyň nusgasy (karz resmileşdirilende asyl nusgasy görkezilýär)
- Nika baglaşylandygy hakyndaky şahadatnamanyň nusgasy (karz resmileşdirilende asyl nusgasy görkezilýär)
- Girdeji barada güwänama (ähli tutumlar aýrylyp görkezilen arassa girdeji)
- Telekeçilik işini alyp barýan raýatlar bolsa girdejileri barada salgyt deklarasiýasyny getirmelidirler
- Maşgala düzümi we ýaşaýan ýeriniň ýazgysyny kesgitlemek üçin kepilnama
- Zähmet depderçesiniň nusgasy (möhür bilen tassyklanan bolmaly)
Zamunçylar üçin:
- Karz alyjynyň karzy boýunça zamunçy bolmak razyçylygyny berýän arza
- Pasportyň nusgasy (karz resmileşdirilende asyl nusgasy görkezilýär)
- Girdeji barada güwänama (ähli tutumlar aýrylyp görkezilen arassa girdeji)
- Telekeçilik işini alyp barýan raýatlar bolsa girdejileri barada salgyt deklarasiýasyny getirmelidirler
- Zähmet depderçesiniň nusgasy (möhür bilen tassyklanan bolmaly)
Karz maşgala agzalaryň birisine resmileşdirilýär (adamsyna ýa-da aýalyna) we onuň diňe bir gezekleýin berilýändigi bellenilýär.
