Kompýuter, elektrik we optiki enjamlary öndürmekde ýöriteleşen «Aýdyň gijeler» Hojalyk jemgyýeti hil dolandyryş ulgamynda halkara standartynyň — ISO 9001: 2015 talaplaryna laýyk gelýändigi üçin sertifikat aldy. Bu barada kompaniýanyň metbugat gullugy tarapyndan «Turkmenportala» habar berildi.
Resminamanyň halkara sertifikat guramasy — CERT International tarapyndan berlendigini bellemelidiris.
Resminama «Halkara Standart Hyzmatlary» hususy kärhanasynyň hünärmenleriniň geçiren bilermenler derejesindäki barlaglarynyň netijesinde berildi.
2021-nji ýylyň noýabryndan 2022-nji ýylyň apreline çenli «Aýdyň gijeler» Hojalyk jemgyýeti hil dolandyryş ulgamyny yzygiderli kämilleşdirdi. Bu döwürde halkara ülňülerine laýyk gelýän ähli zerur işler geçirildi.
«Aýdyň gijeler» hojalyk jemgyýeti 2016-njy ýylda döredildi we häzirki günde ýurtdaky has üstünlikli ýokary tehnologiýaly hususy kärhanalarynyň biri bolup durýar.
