Biraz ozal Türkmenistanyň milli zenanlar ýygyndysy CAFA-2022 çempionatyndaky ikinji duşuşygyny geçirdi. Täjigistanyň paýtagty Duşenbe şäherindäki Merkezi stadionda geçirilen oýunda Kamil Mingazowyň şägirtleri Gyrgyzystanyň ýygyndysyna garşy meýdança çykdylar. Ikitaraplaýyn hüjümlere baý geçen gapma-garşylykda gol urmak hiç bir topara başartmady we oýun 0-0 hasabyndaky deňlikde tamamlandy.
Şeýlelikde, ildeşlerimiz Merkezi Aziýanyň Futbol Assosiasiýasynyň milli zenanlar ýygyndylarynyň arasyndaky çempionatyndaky ikinji oýunlarynda hem deň oýnap, utuklarynyň sanyny 2-ä ýetirdiler. Bu günki garşydaş topar Gyrgyzystanyň hasabynda bolsa iki oýundan soňra 1 utuk bar.
Türkmenistanyň milli zenanlar ýygyndysy ýaryşdaky indiki duşuşygynda Özbegistanyň ýygyndysy bilen duşuşar. Oýun 14-nji iýulda sagat 19:00-da başlanar.
Ýeri gelende ýatladyp geçsek, CAFA-2022 çempionatynda bäş topar, ýagny – Eýranyň, Özbegistanyň, Gyrgyzystanyň, Täjigistanyň we Türkmenistanyň milli zenanlar ýygyndy toparlary sebitiň iň güýçlülerini anyklamak üçin özara güýç synanyşýarlar.
