“Hazar logistik” hususy ulag logistika kompaniýasy eksport amallarynyň mümkinçiliklerini ýokarlandyrmak hem-de strategik hyzmatdaşlygy berkitmek babatdaky maksatlaryny mälim edýär.
Kärhananyň habarlar gullugynda bellenilişi ýaly, “Hazar logistik” Türkmenistanyň ulag logistika hyzmatlary pudagynda öňdebaryjy netijeleri gazanmak, halkara derejelerine çykmak hem-de daşary ýurtlarda kärhananyň merkezlerini açmak ugrunda iş alyp barýar.
Mundan başga-da, kompaniýanyň ileri tutýan ugurlaryna deňiz ulaglary pudagynda we Hazar deňzinde ýük daşamakda öňdebaryjy orny eýelemek maksatlary degişlidir.
Kärhananyň yzygiderli kämilleşdirilmeginde we has ýokary hilli hyzmatlaryň hödürlenilmeginde müşderileriň ynamyny ödemek maksady bilen guramanyň ýolbaşçylary dolandyryşyň halkara standartlarynyň talaplaryny durmuşa geçirmek we ISO 9001-2015 hil şahadatnamasyny almak kararyna geldiler.
“Hazar logistik” kompaniýasy Türkmenistanda logistika hyzmatlaryny hödürlemekde özüni iň bir ygtybarly hyzmatdaşlaryň biri hökmünde tanatdy. Kärhananyň hünärmenleri halkara guramalar bilen hyzmatdaşlygy alyp barmaga we gatnaşyklarynyň çygryny giňeltmäge uly ähmiýet berýärler.
Häzirki wagtda kompaniýa GDA ýurtlarynyň çäklerine, Orta we Merkezi Aziýa, şeýle-de Hytaýyň we BAE-niň uzak sebitlerine ulag üstaşyr ýük daşamalaryny amala aşyrýar.
Şunuň bilen birlikde, “Hazar logistik” kompaniýasy resminamalary taýýarlamak, ýükleri demir ýol menzilinden alyjynyň ammaryna çenli eltip bermek, üstaşyr ýükleri taýýarlamak, ätiýaçlandyrma we ekspeditorçylyk ýaly hyzmatlary ýerine ýetirýär.
Kompaniýa özbaşdak aýratyn ýükleri, şol sanda döwlüp biljek, kiçi göwrümli we usullylygy talap edýän ýükleri daşamakda we ygtybarly saklamakda ähli halkara ülňülerinden we şertlerinden ugur alýandygyny kepillendirýär.
