Aşgabadyň «Agama» alpinizm kluby tarapyndan geçirilen bäşinji fotosurat bäsleşiginiň ýeňijileri kesgitlenildi. «Pikirleriň belentliginde» diýen mowzuk bilen geçirilen bäsleşige gatnaşyjylardan Türkmenistanyň daglarynyň gözelliklerini wasp etmek talap edildi.
Bäsleşige 25 awtordan 300-e golaý eser hödürlenildi. Olara Wladimir Komarow, Igor Lomow, Larisa Fomina, Guseýinkuly Huseýnow, Azat Orazow dagylar baha berdi.
Ýeňijiler üç ugur boýunça kesgitlenildi.
- «Biziň daglarymyz» atly birinji ugurda Kirill Snarýewiň «Saglyk ýolunyň kiçi böleginiň görnüşi», «Markow depesinden Duşak-Erekdag» atly işleri ýeňiji boldy.
- «Biz daglarymyzda» atly ikinji ugurda Semýon Kuznesowyň «Zyýaratçylaryň yzy bilen» we «Sünt-Hasardaga çykmak» atly işleri ilkinji iki orna mynasyp boldy.
- Üçünji ugur «Biziň daglarymyzyň durmuşy» diýlip atlandyryldy. Bu ugurda «Agamanyň» agzasy Ýelena Gurbanowanyň düşüren suratyna taý tapylmady.
