«Ahal» futbol toparynyň ýaşlar düzümi bilen geçirilen ýoldaşlyk duşuşygyndan soňra Türkmenistanyň futbol boýunça 23 ýaşa çenli ýaşlar ýygyndysy ikinji okuw-türgenleşik ýygnanyşygyny tamamlady. Bu ýygnanyşyk 2022-nji ýylda geçiriljek Aziýanyň kubogynyň saýalama tapgyryna taýýarlygyň çäginde bolup geçdi. Ýaşlar ýygyndymyz ýygnanyşykdaky soňky ýoldaşlyk duşuşygynda «Ahalyň» ýaşlar düzüminden 0:2 hasabynda asgyn geldi.
Baş tälimçi Ahmet Agamyradowyň şägirtleriniň şu ýyldaky ilkinji okuw-türgenleşik ýygnanyşygyny awgust aýynyň ortalarynda geçirendigini habar beripdik. Şeýlelikde, ýaşlar ýygyndymyz iki türgenleşikde jemi bäş sany ýoldaşlyk duşuşygyny geçirdiler. Şolaryň ikisi «Ahal» (1:2 we 2:2), galanlary «Aşgabat» (3:0), «Şagadam» (0:1) toparlary we «Ahalyň» ýaşlar düzümi (0:2) bilen geçirildi.
Baş tälimçi bu türgenleşiklerde 23 ýaşa çenli futbolçylaryň 50-sini gözden geçirendigini habar berýär. Ol futbolçylaryň içinden iň gowularyny saýlap, yklym ýaryşynyň Iordaniýada geçiriljek saýlama duşuşyklaryna alyp gider.
Aziýanyň kubogy ― 2022-niň saýlama tapgyrynda biziň ildeşlerimiziň «F» toparçada Iordaniýa we Palestina bilen güýç synanyşjakdygyny ýatladýarys. Duşuşyklar merkezleşdirilen görnüşde Iordaniýada geçiriler. Saýlama tapgyryň duşuşyklarynyň şu ýylyň 23 ― 31-nji oktýabry aralygynda geçirilmegine garaşylýar.
Yklym ýaryşynyň düzgünnamasyna görä, saýlama tapgyrdaky 11 toparçanyň ýeňijisi, ikinji orny eýelän ýygyndylaryň arasyndan iň gowy netije gazanan dördüsi jemleýji ýaryşmaga hukuk gazanar. Şeýlelikde, ýer eýeleri (Özbegistanyň ýaşlar ýygyndysy) bilen bilelikde, jemi 16 ýygyndy Aziýanyň çempiony bolmak üçin göreşer.
Taryhda bäşinji gezek geçiriljek ýaşlaryň arasyndaky Aziýa kubogynyň indiki ýylda Özbegistanda bolmagyna garaşylýar.
