«Türkmenhowaýollary» agentligi häzirki zaman zerurlyklary göz öňünde tutup, howa gatnawlary üçin petekleri onlaýn satyn almaga niýetlenen ykjam programmany taýýarlaýar.
Türkmenistanyň Bitaraplygynyň 25 ýyllygyna bagyşlanan serginiň çäginde täze programmanyň tanyşdyrylyş dabarasy geçirildi. Dabarada hem nygtalyşy ýaly, häzirki wagtda programmany taýýarlamak işi tamamlaýjy tapgyrda barýar. Ol ýakyn wagtda hödürleniler.
Ýeri gelende, onlaýn petek satyn alma programmasynyň birnäçe bölümden ybarat boljakdygyny aýtmak gerek. Müşderi esasy sahypada isleýän uçuş ugruny saýlap, ol barada jikme-jik maglumatlary görüp biler.
Täze programmadaky «Maglumat» bölüminde, adyndan hem belli bolşy ýaly, ýygy-ýygydan berilýän sowallaryň jogaby ýerleşdirilýär. «Habarlar» bölüminde bolsa Türkmenistanyň raýat awiasiýasy bilen baglanyşykly täzelikleri okap bolar. «Beýlekiler» bölüminde müşderi petekleri satyn alyş taryhy bilen tanşyp, islese, agentligiň wekilleri bilen aragatnaşyga geçip biler.
Täze programmada içerki uçuşlar bilen bir hatarda halkara uçuşlar bilen bagly maglumatlar hem ýerleşdiriler. Programma petek üçin tölegleri nag däl görnüşinde geçirmäge mümkinçilik berýär.
Mobil programmany «Appstore» we «Play Market» programma dükanlaryndan mugt ýükläp bolar.
