Geçen möwsüm ýurdumyzyň futbol çempionatynda soňky orny eýelän Balkanabadyň “Nebitçisi” milli çempionatda çykyş edýän futbolçylaryň birnäçesini düzümine geçirdi. “Nebitçiniň” düzümine tejribeli oýunçy Mämmedaly Karadanowyň goşulandygyny bellemek gerek. Şeýle-de, Balkanabadyň toparynyň düzümine “Energetigiň” oýunçylary Begenç Guldurdyýew, Sahupnazar Durdyýew, “Şagadamdan” Nurtagan Mämmedalyýew hem-de paýtagtymyzyň “Aşgabat” toparyndan Elýas Akyýew dagy goşuldylar ― diýip, Türkmenistanyň Futbol federasiýasynyň resmi saýtynda (www.tff.com.tm) habar berilýär.
“Nebitçiniň” kapitany Ýewgeniý Tkaçenkonyň karýerasyny “Merwde” dowam edýändigini ýatladýarys. Şeýle-de, Yhlas Magtymow indiki möwsümden başlap öz çykyşyny “Şagadam” toparynda dowam eder.
Ýeri gelende aýtsak, «Nebitçi» geçen möwsümde ýurdumyzyň futbol çempionatyny soňky, 8-nji orunda tamamlady. Balkanabadyň topary geçiren duşuşyklarynda 20 utuk toplamagy başardy.
