Türkmenistanyň ýaşlar ýygyndysynyň 2020-nji ýylda geçiriljek Aziýa çempionatynyň (U-23) saýlama tapgyryndaky duşuşyklarynyň geçiriljek wagtlary mälim edildi.
7-nji noýabrda Malaýziýanyň Kuala-Lumpur şäherinde geçirilen bije çekişligiň netijesinde Aziýa wekilçilik edýän ýygyndylaryň 44-si toparçalaryň 11-sinde bäsleşjekdigi mälim edildi.
Geçirilen bijä laýyklykda, Türkmenistanyň ýaşlar ýygyndysy “C” toparçada Yragyň, Ýemeniň hem-de Eýranyň ýaşlar ýygyndylary bilen bäsleşmäge mümkinçilik aldy. Bu toparçadaky saýlama tapgyryň duşuşyklary 2019-njy ýylyň 22-26-njy martynda Eýranda geçiriler.
Türkmenistanyň ýaşlar ýygyndysy özüniň birinji duşuşygyny 22-nji martda Eýranyň ýygyndysynyň garşysyna geçirer. Şondan soň ýaş futbolçylarymyz yrakly hem-de ýemenli deň-duşlary bilen duşuşarlar.
Saýlama tapgyrynyň çäginde geçiriljek toparçalaýyn bäsleşikleriň jemi boýunça toparçalaryň ýeňijileri hem-de iň gowy netije görkezenleriň dördüsi Aziýa çempionatynyň final böleginde çykyş etmäge mümkinçilik alarlar. Aziýa çempionatynyň (U-23) 2020-nji ýylyň 8-26-njy ýanwary aralygynda Taýlandda geçiriljekdigini ýatladýarys.
Aziýa çempionatynda ilkinji üç orna mynasyp bolanlar bolsa 2010-njy ýylda Tokioda geçiriljek Olimpiýa oýunlarynda çykyş etmäge mümkinçilik alarlar.
"С" toparçada geçiriljek oýunlaryň geçiş tertibi:
1-nji tapgyr. 22-nji mart
Yrak — Ýemen
Eýran — TÜRKMENISTAN
2-nji tapgyr. 24-nji mart
Ýemen — Eýran
TÜRKMENISTAN — Yrak
3-nji tapgyr. 26-njy mart
Yrak — Eýran
TÜRKMENISTAN — Ýemen
Çeşme: tff.com.tm