Türkmenistanyň daşary işler ministriniň orunbasary Mähri Bäşimowa ÝHHG-niň Daşary işler ministrler geňeşiniň 31-nji mejlisiniň çäklerinde birnäçe gepleşikleri geçirdi. Bu barada Türkmenistanyň DIM-iniň metbugat gullugy habar berdi.
Hususan-da, türkmen diplomaty Kipr Respublikasynyň Daşary işler ministrliginiň Döwlet sekretary bilen bolan duşuşykda ikitaraplaýyn syýasy-diplomatik gatnaşyklar bilen bagly meseleleri ara alyp maslahatlaşdy. Duşuşygyň dowamynda taraplar iki ýurduň arasyndaky hyzmatdaşlygyň şertnama-hukuk binýadyny pugtalandyrmaga taýýardyklaryny mälim etdiler.
Taraplar geljekde syýasy geňeşmeleri geçirmek üçin Daşary işler ministrlikleriniň arasynda özara düşünişmek hakyndaky Ähtnamanyň taslamasynyň üstünde işlemek barada ylalaşdylar. Diplomatlar söwda we senagat ugurlarynda hyzmatdaşlygy ösdürmek barada iki ýurduň degişli edaralarynyň arasynda gepleşikleri ösdürmäge taýýardyklaryny bellediler.
Mundan başgada, M.Bäşimowa Ýewropanyň Daşary aragatnaşyklar gullugynyň Gündogar Ýewropa, Russiýa, Merkezi Aziýa we ÝHHG boýunça dolandyryjy müdiri Mihael Zibert bilen duşuşdy.
Taraplar ikitaraplaýyn we köptaraplaýyn hyzmatdaşlyk bilen bagly meseleleriň uly toplumyny ara alyp maslahatlaşdylar. Hususan-da, Türkmenistan-ÝB bilelikdäki komiteti, adam hukuklary boýunça dialog we parlamentara gepleşikler ýaly bar bolan özara täsirli mehanizmleriň ähmiýeti nygtaldy.
ÝB bilen Merkezi Aziýanyň arasyndaky gatnaşyklary pugtalandyrmaga aýratyn üns berildi. Şu nukdaýnazardan ugur alyp, taraplar geljek ýyl Türkmenistanda ÝB — Merkezi Aziýa formatynyň daşary syýasat edaralarynyň ýolbaşçylarynyň nobatdaky mejlisini guramak meselesi barada hem pikir alyşdylar.
