Gazagystan Türkmenistanyň çägi arkaly Owganystana eksport edýän gallasynyň möçberini artdyrmak isleýär. Owgan tarapy Gazagystandan 200 müň tanna galla import etmäge taýýar. Bu barada «Kazakstan temir joly» Milli kompaniýasyna salgylanyp, «Report» habar berdi.
Çeşmäniň bellemegine görä, golaýda ýük daşaýjylar we Beýneu galla elewatorynyň hünärmenleriniň arasynda galla önümlerini Owganystana daşamak meselesi boýunça gepleşikler geçirildi. Duşuşyga Gazagystanyň «Azyk korporasiýasy» paýdarlar jemgyýetiniň wekilleri hem gatnaşdy.
«Duşuşyga gatnaşanlar Serhetabat (Türkmenistan) — Turgundi (Owganystan) serhet geçelgeleri arkaly Owganystana galla önümlerini daşamagyň mümkinçiliklerini ara alyp maslahatlaşdylar. Owganystan, takmynan, 200 müň tonna galla önümini satyn almaga taýýar. Şeýle-de Türkmenistanyň ulag ulgamynyň ýolbaşçylary bilen ýükli we boş awtoulaglaryň ýurduň çäginden geçiş tizligini ýokarlandyrmak meseleleri boýunça gepleşikler geçirildi» diýlip, çeşmede bellenilýär.
