27-nji oktýabrdan 29-njy oktýabr aralygynda Türkmenistanda Ermenistanyň Medeniýet günleri geçiriler. Bu barada Ermenistanyň Türkmenistandaky ilçihanasynyň metbugat gullugy habar berdi.
Medeniýet günleriň maksatnamasy diýseň baý we dürli-dürli bolar. Hususan-da, türkmenistanlylara ermeni halkynyň baý medeni mirasy bilen tanyşmaga mümkinçilik berýän çeper filmleriň, ekspozisiýalaryň we konsertleriň görkezilmegine garaşylýar.
Bellenilişi ýaly, 27-nji oktýabrda sagat 17:00-da «Aşgabat» kinoteatrynda ermeni ýazyjysy we şahyry Waan Totowensiň eseri esasynda döredilen «Şarpyk» filmi görkeziler. Şeýle hem sagat 17:00-da «Watan» kinokonsert merkezinde birnäçe ermeni multifilmleri görkeziler.
28-nji oktýabrda sagat 17:00-da «Watan» kinokonsert merkezinde «Aýrik» (1972) çeper filminiň görkezilişi bolar. 19:00-da Türkmenistanyň Döwlet medeniýet merkeziniň Mukamlar köşgünde Ermenistan Respublikasynyň Türkmenistandaky Medeniýet günleriniň açylyş dabarasy geçiriler. Çäräniň dowamynda ermenistanly sungat ussatlarynyň çykyşlary bolar.
29-njy oktýabrda, sagat 17:00-da «Aşgabat» kinoteatrynda ermeni multifilmleriniň görkezilişi bolar. Şol bir wagtyň özünde, «Watan» kinokonsert merkezinde «Bagdasaryň maşgalasy» (1976) atly komediýa görkeziler.
Şol gün 19:00-da Türkmenistanyň Döwlet medeniýet merkeziniň Mukamlar köşgünde Ermenistan Respublikasynyň Türkmenistandaky Medeniýet günleriniň ýapylyş dabarasy geçiriler. Dabaranyň dowamynda Türkmenistan bilen Ermenistanyň medeniýet we sungat ussatlarynyň bilelikdäki konserti bolar.
