Ankara Aşgabat bilen hyzmatdaşlygy giňeltmegi meýilleşdirýär. Bu energiýa pudagynda ägirt uly taslamalary we söwda dolanyşygyny takmynan iki esse ýokarlandyrmagy öz içine alýar. Türkiýäniň Türkmenistandaky ilçisi Ahmet Demirok «Anadolu» habarlar agentligine beren interwýusynda iki ýurduň strategiki hyzmatdaşlygynyň jikme-jikliklerini açyp görkezdi.
Türk tarapy Türkmenistany diňe ikitaraplaýyn gatnaşyklarda däl, eýsem ulag geçelgelerini ösdürmek we türki dünýäsinde gatnaşyklary pugtalandyrmak meselesinde-de möhüm hyzmatdaş hökmünde görýär.
Demirok Türkiýe bilen Türkmenistanyň arasyndaky taryhy ýakyn gatnaşyklary belläp, öz ýurdunyň ilkinji bolup Türkmenistanyň Garaşsyzlygyny ykrar edendigini we Aşgabatda ilçihana açandygyny aýtdy. Onuň sözlerine görä, umumy taryh, dil, din we medeniýet esasynda döwletleriň arasyndaky gatnaşyklar birek-birege hormat goýmak we hyzmatdaşlyk ýörelgelerine esaslanýar.
Söhbetdeşlikde energiýa hyzmatdaşlygyna aýratyn üns berildi. Ilçi ýaňy-ýakynda gol çekilen tebigy gaz we uglewodorod baýlyklary baradaky Ähtnamalar barada aýtdy.
Demirok, şeýle hem ulag hyzmatdaşlygy mowzugyna ünsi çekip, Türkmenistanyň Hytaý we Hazar deňziniň üsti bilen Ýewropany birleşdirýän Merkezi geçelge ugrundaky strategik pozisiýasyna ünsi çekdi. Ilçi Azerbaýjandaky Alýat, Gazagystandaky Aktau we Türkmenistandaky Türkmenbaşy portlarynyň Hazar deňziniň üsti bilen hyzmatdaşlygy ösdürmekdäki ähmiýetini hem belläp geçdi.
Ilçi ýakyn wagtda Türkmenistanyň Türki döwletleri guramasynyň (TDG) doly hukukly agzasy boljakdygyna umyt bildirdi we munuň türki dünýäsinde hyzmatdaşlygy güýçlendirjekdigini, sebitiň ösüşine möhüm goşant goşjakdygyny belledi.
Sözüniň ahyrynda Demirok dünýädäki häzirki syýasy we ykdysady ýagdaýyň, şeýle hem barha artýan daşky gurşaw meseleleriniň Türkiýe bilen Türkmenistanyň, esasan hem energetika pudagynda hyzmatdaşlygy giňeltmek üçin amatly şertleri döredýändigini aýtdy.
