Amerikanyň Birleşen Ştatlarynyň Senaty Elizabet Rudy ABŞ-nyň Türkmenistandaky Adatdan daşary we Doly ygtyýarly ilçisi wezipesine bellenmegini tassyklady. Bu barada ABŞ-nyň Senatynyň resmi web sahypasynda habar berildi.
Rud 2022-nji ýylyň awgust aýynda Prezident Jo Baýden tarapyndan ABŞ-nyň Türkmenistandaky ilçisi wezipesine dalaşgär hökmünde hödürlendi.
Mundan ozal Elizabet Rud ABŞ-nyň Harby kollejinde fakultet geňeşçisi, ABŞ-nyň Gruziýanyň Tbilisi şäherindäki diplomatik wekilhanasynyň ýolbaşçysynyň orunbasary, ABŞ-nyň Russiýadaky işleri wagtlaýyn ynanylan wekili wezipelerinde işledi.
Şeýle hem ol ABŞ-nyň Owganystanyň paýtagty Kabuldaky ilçihanasynda Syýasy meseleler boýunça geňeşçi bolup işledi, Ýewropa we Ýewraziýa Býurosyndaky Kawkaz we sebit konfliktleri bölümine ýolbaşçylyk etdi, Pakistanyň Peşawar şäherindäki ABŞ-nyň Baş konsullygynyň Baş hünärmeni bolup zähmet çekdi, Döwlet departamentiniň Owganystanyň günorta-gündogaryndaky welaýat Dikeldiş toparynyň wekili, Nagorno-Garabag, Abhaziýa, Günorta Osetiýa we Pridnestrowýedäki konfliktler boýunça ABŞ-nyň ýörite gepleşikleri geçirijisiniň orunbasary wezipesinde hem işledi.
Rud Demirgazyk Karolina ştatynyň Keri şäherinde dünýä indi. Ol Merilend uniwersitetinde magistr we Rendolf-Meýkon aýallar kollejinde okap ynsanperwer ylymlary boýunça bakalawr derejelerini alýar. Diplomat fransuz, rus, nemes, puştun, dari we gruzin dillerinde gürleýär.
Amerikanyň Birleşen Ştatlary 1992-nji ýylyň 19-njy fewralynda Türkmenistan bilen diplomatik gatnaşyklaryny ýola goýdy. 2019-njy ýyldan bäri Mettýu Stiwen Klimow Amerikanyň Birleşen Ştatlarynyň Türkmenistandaky Adatdan daşary we Doly ygtyýarly ilçisi wezipesini ýerine ýetirýär.
