Türkmen döwlet habarlar agentliginiň fotohabarçysy Wýaçeslaw Sarkisýan Halkara Fotografiýa sungaty federasiýasynyň (FIAP), Global fotobileleşigiň (GPU) hem-de PSA amerikan fotosurat jemgyýetiniň howandarlygynda geçirilen halkara bäsleşikde nobatdaky gezek abraýly baýraga mynasyp boldy.
«Türkmenistan: Altyn asyr» internet neşiri, golaýda PST, CAPA we PSTw ýaly iň iri fotosurat jemgyýetleri ýaryşyň netijelerini jemledi we Wýaçeslaw Sarkisýan kümüş baýrak bilen sylaglandy diýip habar berýär. Mundan başga-da, ol ýörite baýragyň — FIAP Hormat lentasynyň eýesi boldy.
Türkmen fotohabarçysy — halkara ýaryşlaryň we surat sergileriniň köp gezek gatnaşyjysy we ýeňijisi.
Nobatdaky halkara bäsleşigiň baýragy W.Sarkisýanyň fotosurat eseriniň 300-den gowrak awtor tarapyndan bäsleşige hödürlenen dört ýarym müň töweregi fotosuratdan öňe saýlanandygy bilen aýratyn ähmiýete eýedir.
W.Sarkisýanyň fotosurat eserleri dürli ýyllarda Russiýada, Marokkoda, Hytaýda, ABŞ-da we Çehiýada geçirilen bäsleşiklerde tapawutly baýraklara mynasyp görüldi.
