28-nji noýabrda Türkmenistanyň Döwlet gümrük gullugynyň başlygy Azerbaýjan Respublikasynyň Döwlet gümrük komitetiniň başlygy Ş.Bagirow bilen duşuşdy. Duşuşyk Döwlet gümrük gullugynyň Merkezi edarasynda geçirildi.
Ş.Bagirow azerbaýjan tarapyndan Ykdysady hyzmatdaşlyk boýunça türkmen-azerbaýjan hökümetara toparynyň düzüminde Aşgabada geldi diýip, Türkmenistanyň Döwlet gümrük gullugynyň metbugat gullugy habar berýär.
Duşuşygyň barşynda ýolbaşçylar iki ýurduň gümrük edaralarynyň arasyndaky hyzmatdaşlygyň häzirki ýagdaýyna baha berdiler. Şeýle hem taraplar ikitaraplaýyn özara hereketiň geljekde ileri tutulýan ugurlaryny ara alyp maslahatlaşdylar.
Saparynyň çäginde azerbaýjanly myhman gümrük gullugynyň işi bilen tanyşdyryldy. Ol binada ýerleşýän seljeriş merkezini, iş otaglaryny, kitaphanany, köpugurly sport zalyny aýlanyp gördi we Döwlet gümrük gullugynyň muzeý otagyna baryp, myhmanlaryň hormat kitabyna ýadygärlik ýazgysyny galdyrdy.
