Täjigistan Respublikasynyň Prezidenti Emomali Rahmon türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy Merkezi Aziýa ýurtlarynyň döwlet Baştutanlarynyň şu ýylyň 14-nji sentýabrynda Duşenbe şäherinde geçiriljek bäşinji ýubileý konsultatiw duşuşygyna gatnaşmaga çagyrdy. Bu barada täjik Liderinden türkmen halkynyň Milli Lideriniň adyna gelip gowşan hatda aýdylýar.
«Watan» habarlar gepleşiginde habar berlişi ýaly, Täjigistan Respublikasynyň Prezidentiniň hatynda, hususan-da, şeýle diýilýär:
— Hormatly Gurbanguly Mälikgulyýewiç!
Ozaly bilen, şu ýylyň awgust aýynyň başynda Aşgabatda saparda bolanymda maňa bildirilen mähirli myhmansöýerlik üçin Size tüýs ýürekden hoşallygymy beýan edýärin.
Türkmenistanyň paýtagtynda geçirilen ýokary derejedäki üçtaraplaýyn duşuşyk sebitimiziň möhüm meselelerini açyklyk we ynanyşmak ýagdaýynda ara alyp maslahatlaşmaga mümkinçilik berdi.
Özara ynama esaslanýan syýasy dialogyň ösdürilmegine möhüm ähmiýet berip, uly şatlyk bilen, Sizi Merkezi Aziýa ýurtlarynyň döwlet Baştutanlarynyň şu ýylyň 14-nji sentýabrynda Duşenbe şäherinde geçiriljek bäşinji ýubileý konsultatiw duşuşygyna gatnaşmaga çagyrýaryn.
Öňde boljak duşuşygyň sebit hyzmatdaşlygyny has-da ösdürmäge hem-de biziň umumy öýümiz — Merkezi Aziýada howpsuzlygyň we durnuklylygyň mundan beýläk-de pugtalandyrylmagyna ýardam berjekdigine ynanýaryn.
Hormatly Gurbanguly Mälikgulyýewiç, Size berk jan saglyk, abadançylyk we üstünlikleri, Türkmenistanyň doganlyk halkyna bolsa bagtyýarlyk we rowaçlyk arzuw edýärin.
Duşenbede boljak duşuşygymyza uly şatlyk bilen garaşýaryn.
