Türkmenistanyň Prezidentiniň geçen ýylyň noýabr aýynda gol çeken Ýewropa sebitinde ýokary bilim boýunça hünär derejelerini ykrar etmek hakyndaky Konwensiýa goşulmaly Kanunyna laýyklykda, Türkmenistanyň Bilim ministrliginiň Innowasiýa maglumat merkezi ýokardaky konwensiýada görkezilen milli maglumat merkezleriniň wezipelerini ýerine ýetirýän ygtyýarly edara hökmünde kesgitlenildi.
Innowasiýa maglumat merkezi Ýewropa sebitinde ýokary bilim bilen baglanyşykly hünärleriň ykrar edilmegi baradaky Konwensiýadan gelip çykýan borçnamalaryň ýerine ýetirilmegini üpjün etmek, Türkmenistanda daşary ýurtlarda berlen orta we ýokary hünär bilimleri baradaky resminamalaryň ykrar edilmegi boýunça işleri gowulandyrmak üçin döredildi.
Öňde goýlan bu möhüm wezipeler merkeziň nic.gov.tm ady bilen 21-nji iýulda açylan resmi web sahypasy arkaly ýeňilleşdiriler. Web sahypasynda türkmen, rus we iňlis dillerinde dürli maglumatlar bar. Bu barada «Türkmenistan: Altyn asyr» saýty habar berdi.
Degişli bölümlerde Türkmenistanda ýokary we orta hünär bilim hakynda resminamalary ykrar etmegiň tertipleri hakynda, daşary ýurtlarda berlen, munuň üçin zerur resminamalaryň sanawy we ykrar etmegiň tertibi; halkara bilim ulgamynyň we Türkmenistanyň kadalaşdyryjy resminamalary; bilim ulgamynda hyzmatdaşlyk baradaky halkara şertnamalar ýerleşdirildi.
Daşary ýurtda bilim almagy meýilleşdirýän ýaşlar üçin hem bu saýt Türkmenistanyň raýatlarynyň daşary ýurtlaryň ýokary we orta hünär okuw mekdeplerinde bilim almagy baradaky düzgünler bilen tanyşmakda peýdaly bolar.
