Türkmenistanyň Daşary işler ministri Raşid Meredow Ženewa iş saparynyň barşynda halkara guramalaryň birnäçesiniň ýolbaşçylary bilen duşuşyklary geçirdi. Hususan-da, BMG-niň Baş sekretaryň orunbasary, BMG-niň Ženewadaky edarasynyň baş müdiri Tatýana Walowaýa bilen geçirilen duşuşykda Türkmenistanyň bu gurama bilen strategik hyzmatdaşlygynyň köp sanly meselesi ara alnyp maslahatlaşyldy.
Ministr Raşid Meredow halkara jemgyýetçiligi tarapyndan ykrar edilen hemişelik Bitaraplyk ýagdaýyna eýe bolan ýurt hökmünde Türkmenistanyň parahatçylygy we howpsuzlygy berkitmek ugrundaky tagallalaryň birleşdirilmegini goldaýandygyny aýtdy. Bu ugurda anyk ädimleri belläp, Türkmenistanyň daşary syýasat edarasynyň başlygy Türkmenistanyň BMG-de öňe süren birnäçe möhüm halkara başlangyçlaryna ünsi çekdi.
Duşuşykda mundan birnäçe ýyl ozal Aşgabatda Birleşen Milletler Guramasynyň howandarlygynda geçirilen Merkezi Aziýa sebitinde we Hazar sebitinde ýaragsyzlanmak meselesine bagyşlanan wekilçilikli halkara maslahatyň ähmiýeti bellendi. Taraplar şeýle hem maglumat pudagynda, halkara žurnalistleri taýýarlamak pudagynda hyzmatdaşlygy giňeltmek bilen baglanyşykly meseleleri ara alyp maslahatlaşdylar hem-de bu ugurda bilelikdäki çäreleri görmek barada ylalaşdylar.
Şeýle hem R.Meredow Baş sekretaryň orunbasary, BMG-niň Ýewropa Ykdysady Komissiýasynyň (UNECE) Ýerine ýetiriji sekretary hanym Olga Algaerowa bilen duşuşdy. Duşuşykda Türkmenistan bilen UNECE-niň arasyndaky hyzmatdaşlygyň ýagdaýy we geljegi seljerilip, durnukly energiýa, ulag, sanlylaşdyrma ýaly ugurlarda gepleşikleri güýçlendirmek boýunça çäreler barada ylalaşyldy.
Bütindünýä intellektual eýeçilik guramasynyň baş müdiri Daren Tang bilen geçirilen gepleşiklerde Raşid Meredow intellektual eýeçilik we degişli döwlet gurluşlarynyň işi boýunça milli derejede gazanylan amaly netijeler bilen tanyşdyrdy.
