Türkmenistan Russiýa Federasiýasy bilen ulag ulgamyndaky hyzmatdaşlygynyň çäklerinde Demirgazyk – Günorta geçelgesinde hem uly mümkinçilikleri görýär we oňa goşulmak isleýär diýip, «Ria.ru» habarlar gullugy Türkmenistanyň daşary işler ministri Raşid Meredowyň 19-njy awgustda Aşgabatda geçirilen brifingdäki çykyşyna salgylanyp, habar berýär.
Habarda bellenilişi ýaly, R.Meredow çykyşynda Türkmenistanyň ulag gatnawlarynyň, ulag ýollarynyň ähli görnüşleri boýunça rus kärdeşleri bilen hyzmatdaşlygyny dowam etdirjekdigini nygtady. Şeýle-de iki ýurduň özara bähbitli hyzmatdaşlygyny ösdürmekde Demirgazyk – Günorta ulag geçelgesiniň çäginde uly mümkinçilikleriniň bardygyny belledi.
Russiýa, Eýran we Hindistan tarapyndan esaslandyrylan bu ulag geçelgesi baradaky Şertnama 2000-nji ýylda güýje girdi. Raşid Meredow öz çykyşynda şular barada aýtmak bilen, häzirki wagtda Türkmenistanyň hem bu Şertnama goşulmak üçin degişli işlere girişendigini belläp geçdi.
