Şu gün Eýran Yslam Respublikasynyň paýtagty Tähran şäherinde Türkmenistanyň daşary işler ministri, wise-premýer Raşid Meredow eýranly kärdeşi Hosseýn Amir Abdollahiýan bilen duşuşdy. Bu barada IRNA habarlar agentligi habar berýär. Bellenilşi ýaly, bu duşuşyk Türkmenistanyň Prezidentiniň Tährana amala aşyrjak iki günlük resmi saparynyň öňüsyrasynda geçirilýär. Taraplar duşuşygyň dowamynda hormatly Prezident Serdar Berdimuhamedowyň goňşy ýurda amala aşyrjak saparynyň meýilnamasyny we gepleşikleriň netijeleri boýunça gol çekiljek resminamalaryň taslamalaryny ara alyp maslahatlaşdylar.
Habar berlişi ýaly, şu gün agşam Türkmenistanyň Prezidenti eýran Lideriniň çakylygy bilen Tährana barar. Iki günlük resmi saparyň meýilnamasyna görä, ýokary wezipeli myhmanyň «Saadabad» kabul ediş toplumynda resmi garşylanmagy, Eýran Yslam Respublikasynyň Prezidenti bilen duşuşmagy we gepleşik geçirmegi, iki ýurduň wekiliýetleriniň bilelikdäki mejlisiniň geçirilmegi we hyzmatdaşlyk resminamalaryna gol çekilmegi meýilleşdirilýär.
